← முகப்புமதுரை →

மதுரை அரசு ராஜாஜி மருத்துவமனையில் தொடரும் அவலங்கள்! பணம் கேட்பதாகப் புகார்

மதுரை நவ.19 : மதுரை அரசு ராஜாஜி மருத்துவமனையில் நோயாளிகளுக்கு வழங்கப்படும் அடிப்படைச் சேவைகள் தொடர்பாக அடுத்தடுத்து புகார்கள் எழுந்து வருவது பொதுமக்களிடையே அதிர்ச்சியையும் அதிருப்தியையும் ஏற்படுத்தியுள்ளது. நோயாளிகளை ஸ்டெச்சரில் அழைத்துச் செல்வதற்குக்கூட ஊழியர்கள் பணம் கேட்பதாக இளைஞர் ஒருவர் வீடியோ வெளியிட்டுள்ள நிலையில், மருத்துவமனையில் நிலவும் கொசுத் தொல்லை, தூய்மைக் குறைபாடு உள்ளிட்ட பிரச்சினைகளும் தற்போது கவனம் பெற்றுள்ளன.

மதுரை அரசு ராஜாஜி மருத்துவமனையில் தொடரும் அவலங்கள்! பணம் கேட்பதாகப் புகார்

ஸ்டெச்சர் தள்ளுவதற்குக்கூட பணம் கேட்கிறார்களா?

மதுரை அரசு ராஜாஜி மருத்துவமனையில் நோயாளிகளை ஒரு இடத்திலிருந்து மற்றொரு இடத்திற்கு ஸ்டெச்சர் மூலம் அழைத்துச் செல்லும் ஊழியர்கள், ஒவ்வொரு முறையும் அதற்காகப் பணம் கேட்பதாக இளைஞர் ஒருவர் வீடியோ வெளியிட்டு குற்றம்சாட்டியுள்ளார். அரசு மருத்துவமனையில் நோயாளிகளுக்கு வழங்கப்பட வேண்டிய அடிப்படைச் சேவைகளுக்குக்கூட பணம் கேட்கப்படுவதாக எழுந்துள்ள இந்தப் புகார் பெரும் பரபரப்பை ஏற்படுத்தியுள்ளது.

Zamorra BNPD Shopping

Buy Now ! Pay Daily !

ஏற்கனவே உடல்நலப் பாதிப்பால் அவதிப்பட்டு மருத்துவமனைக்கு வரும் ஏழை, எளிய மக்கள், இதுபோன்ற கூடுதல் சிரமங்களையும் எதிர்கொள்ள வேண்டிய நிலை இருப்பதாகப் பொதுமக்கள் வேதனை தெரிவிக்கின்றனர்.

இரவு நேரங்களில் அதிகரிக்கும் கொசுத் தொல்லை!

இதற்கிடையே, மருத்துவமனையில் இரவு நேரங்களில் கொசுத் தொல்லை அதிகமாக இருப்பதாகவும் நோயாளிகள் மற்றும் அவர்களுடன் தங்கியிருக்கும் உறவினர்கள் நிம்மதியாகத் தூங்க முடியாத சூழல் நிலவுவதாகவும் புகார்கள் எழுந்துள்ளன. குறிப்பாக, மருத்துவமனையின் பல்வேறு வார்டுகளில் தூய்மைப் பராமரிப்பு முன்பு இருந்ததைவிட தற்போது குறைந்துள்ளதாகவும், சுகாதாரமான மருத்துவச் சூழலைப் பராமரிப்பதில் நிர்வாகம் கூடுதல் கவனம் செலுத்த வேண்டியுள்ளதாகவும் பொதுமக்கள் தெரிவிக்கின்றனர்.

கொசு வலை பொருத்தப்பட்டுள்ளதா? உயர்நீதிமன்ற மதுரை கிளை கேள்வி!

இந்தச் சூழலில், மதுரை அரசு மருத்துவமனையின் சுகாதாரப் பராமரிப்பு தொடர்பாக கடந்த அக்டோபர் 12ம் தேதி உயர்நீதிமன்ற மதுரை கிளை நீதிபதிகள் எழுப்பியுள்ள கேள்விக்கு இன்று வரை தீர்வு இல்லை.

மதுரை அரசு மருத்துவமனையின் அனைத்து வார்டுகளிலும் உள்ள ஜன்னல்களுக்கு கொசு வலை பொருத்தப்பட்டுள்ளதா என நீதிபதிகள் கேள்வி எழுப்பியுள்ளனர். மேலும், அரசு மருத்துவமனைகளில் இல்லாத சில மருத்துவ உபகரணங்களும் நவீன தொழில்நுட்ப வசதிகளும் தனியார் மருத்துவமனைகளில் இருப்பதாகச் சுட்டிக்காட்டிய நீதிபதிகள், இதுபோன்ற முரண்பாடான நிலையே தொடர்ந்து வருவதாகக் கருத்து தெரிவித்துள்ளனர்.

இந்த விவகாரம் தொடர்பாக சுகாதாரத்துறை இயக்குநர் பதில் மனு தாக்கல் செய்ய வேண்டும் என்றும் உயர்நீதிமன்ற மதுரை கிளை உத்தரவிட்டுள்ளது. அரசு மருத்துவமனைகளில் நோயாளிகளுக்குத் தேவையான அடிப்படை வசதிகள் மற்றும் நவீன மருத்துவ உபகரணங்கள் முறையாகக் கிடைக்க வேண்டியதன் அவசியத்தையும் நீதிமன்றத்தின் கேள்விகள் மீண்டும் முன்னிலைப்படுத்தியுள்ளன.

அமைச்சர் உடனடியாகத் தலையிட வேண்டும்!

ஒருபுறம் ஸ்டெச்சர் சேவைக்குப் பணம் கேட்பதாகப் புகார், மறுபுறம் இரவு நேர கொசுத் தொல்லை, தூய்மைப் பராமரிப்பில் குறைபாடு எனப் பல்வேறு பிரச்சினைகள் குறித்து பொதுமக்கள் கவலை தெரிவித்து வரும் நிலையில், உயர்நீதிமன்றமும் மருத்துவமனையின் அடிப்படைச் சுகாதார வசதிகள் குறித்து கேள்வி எழுப்பியுள்ளது.

எனவே, மக்கள் நல்வாழ்வுத் துறை அமைச்சர் அருண்ராஜ் இந்த விவகாரத்தில் உடனடியாகத் தலையிட்டு மதுரை அரசு ராஜாஜி மருத்துவமனையில் நேரடி ஆய்வு மேற்கொள்ள வேண்டும் என்றும், நோயாளிகளிடம் பணம் கேட்பதாக எழுந்துள்ள புகார்கள் குறித்து உரிய விசாரணை நடத்தி நடவடிக்கை எடுக்க வேண்டும் என்றும் பொதுமக்கள் கோரிக்கை விடுத்துள்ளனர்.

அரசு மருத்துவமனை என்பது ஏழை, எளிய மக்களின் உயிர்காக்கும் நம்பிக்கையாக இருக்க வேண்டுமே தவிர, அடிப்படைச் சேவைகளுக்குக்கூட அவர்கள் சிரமப்படும் இடமாக மாறிவிடக் கூடாது. நோயாளிகளுக்குத் தரமான சிகிச்சை, சுகாதாரமான சூழல், முறையான அடிப்படை வசதிகள் ஆகியவை உறுதி செய்யப்படுமா என்பதே தற்போது மதுரை மக்களின் எதிர்பார்ப்பாக உள்ளது.

Zamorra BNPD Shopping

Buy Now ! Pay Daily !