ஒரு நிமிடம் கற்பனை செய்து பாருங்கள்...காலையில் எழுந்தவுடன் வீட்டில் குழாயைத் திறக்கிறோம்,தண்ணீர் வரவில்லை, குளிப்பதற்குத் தண்ணீர் இல்லை. சமைப்பதற்குத் தண்ணீர் இல்லை.குடிப்பதற்குக்கூட தண்ணீர் இல்லை.பணம் இருக்கிறது வீடு இருக்கிறது. வாகனம் இருக்கிறது.ஆனால் உயிர் வாழ்வதற்கு அத்தியாவசியமான தண்ணீர் மட்டும் இல்லை!
அப்படியொரு நிலை ஏற்பட்டால் மனிதனின் செல்வத்திற்கும் ஆடம்பரத்திற்கும் என்ன மதிப்பு? இது வெறும் கற்பனை அல்ல.உலகின் பல பகுதிகளில் ஏற்பட்டுள்ள தண்ணீர் நெருக்கடிகள் நமக்கு விடுக்கும் எச்சரிக்கை!
Buy Now ! Pay Daily !
கேப் டவுன் நகரம் உலகிற்குக் கற்றுக்கொடுத்த பாடம்
தென்னாப்பிரிக்காவின் கேப் டவுன் நகரம் 2018ஆம் ஆண்டு வரலாறு காணாத கடுமையான குடிநீர் நெருக்கடியைச் சந்தித்தது. அணைகளில் நீர்மட்டம் மிகவும் குறைந்ததால், நகரின் பெரும்பாலான வீடுகளுக்கு வழக்கமான குடிநீர் விநியோகத்தை நிறுத்த வேண்டிய அபாயம் உருவானது. அந்த அபாயகரமான நாளுக்கு 'DAY ZERO' என்று பெயரிடப்பட்டது.

மக்கள் தண்ணீரை மிகவும் சிக்கனமாகப் பயன்படுத்த வேண்டிய கட்டாயம் ஏற்பட்டது. தண்ணீர் பயன்பாட்டிற்குக் கடுமையான கட்டுப்பாடுகள் விதிக்கப்பட்டன. ஆனால் மக்களின் ஒத்துழைப்பு, அரசாங்கத்தின் நீர் மேலாண்மை நடவடிக்கைகள் மற்றும் பின்னர் கிடைத்த மழைப்பொழிவு ஆகியவற்றால் அந்தப் பேராபத்து தவிர்க்கப்பட்டது.கேப் டவுன் நகரம் தண்ணீர் முற்றிலும் தீர்ந்த நகரமாக மாறவில்லை.ஆனால் அந்த நகரம் உலகிற்கு உணர்த்திய பாடம் மிகவும் முக்கியமானது.இன்று ஒரு நகரத்திற்கு ஏற்பட்ட தண்ணீர் நெருக்கடி, நாளை உலகின் எந்த நகரத்திற்கும் ஏற்படலாம்!
இந்தியாவுக்கு இது புதிய அனுபவமா?
மகாராஷ்டிராவின் லாத்தூர் நகரில் கடுமையான வறட்சி ஏற்பட்டபோது, ரயில்கள் மூலம் தண்ணீர் கொண்டு செல்லப்பட்டதை நாம் மறந்துவிட முடியாது. சென்னையில் குடிநீர் பற்றாக்குறையால் மக்கள் காலிக் குடங்களுடன் நீண்ட வரிசையில் காத்திருந்த நாட்களையும் மறந்துவிட முடியாது.

ஒருபுறம் மழை வெள்ளம்! மறுபுறம் குடிநீர் பற்றாக்குறை! இந்த முரண்பாடான சூழ்நிலைக்கு மழைப்பொழிவின் மாற்றங்கள் மட்டுமல்ல, நீர் மேலாண்மையில் உள்ள குறைபாடுகளும் காரணமாகின்றன. ஏரிகள்,குளங்கள்,ஆறுகள் உள்ளிட்ட நீர்நிலைகளைப் பாதுகாக்கத் தவறினால்,எதிர்காலத்தில் தண்ணீர் நெருக்கடி மேலும் தீவிரமடையக்கூடும்.
தண்ணீரை விலைக்கு வாங்கலாம்... மழையை வாங்க முடியுமா?
மனிதன் இன்று அறிவியல் வளர்ச்சியின் உச்சத்தை நோக்கிப் பயணித்துக் கொண்டிருக்கிறான். விண்வெளியை ஆராய்கிறான். செவ்வாய்க் கிரகத்தில் மனிதர்கள் வாழ்வதற்கான சாத்தியக்கூறுகளை ஆராய்கிறான். செயற்கை நுண்ணறிவின் மூலம் உலகையே மாற்ற முயற்சிக்கிறான்.
ஆனால் தான் வாழும் பூமியில் இயற்கை வழங்கிய தண்ணீரைப் பாதுகாக்கத் தவறினால், அந்த வளர்ச்சியால் என்ன பயன்? பணத்தைக் கொடுத்து குடிநீரை வாங்கலாம். ஆனால் வறண்டு போன ஒவ்வொரு நீர்நிலையையும் பணத்தால் உடனடியாக மீட்டெடுக்க முடியுமா? தண்ணீரின் மதிப்பைத் தாகம் வந்த பிறகு உணர்வதைவிட, தண்ணீர் இருக்கும்போதே உணர்வதுதான் உண்மையான அறிவு!
தண்ணீர் சேமிப்பு என்பது ஒவ்வொரு குடிமகனின் கடமை
தண்ணீர் பற்றாக்குறை ஏற்பட்டவுடன் அரசாங்கத்தைக் குறை கூறுகிறோம். ஆனால் நமது வீட்டில் தினமும் எவ்வளவு தண்ணீர் வீணாகிறது என்பதை நாம் சிந்தித்துப் பார்க்கிறோமா? குழாயைத் திறந்து வைத்தபடி பல் துலக்குகிறோம். வாகனங்களைத் தேவையில்லாமல் தண்ணீர் ஊற்றிக் கழுவுகிறோம். கசியும் குழாய்களைச் சரிசெய்யாமல் விட்டுவிடுகிறோம்.
மழைநீரைச் சேமிக்காமல் வீணாக வெளியேற்றுகிறோம். இந்தச் சிறிய அலட்சியங்கள்தான் நாளடைவில் பெரிய பிரச்சினைகளாக மாறுகின்றன.ஒவ்வொரு வீட்டிலும் தண்ணீர் சேமிப்பு தொடங்க வேண்டும். மழைநீர் சேகரிப்பு முறைகள் கட்டாயம் நடைமுறைப்படுத்தப்பட வேண்டும். நீர்நிலைகள் பாதுகாக்கப்பட வேண்டும். பள்ளிகளில் குழந்தைகளுக்குத் தண்ணீர் சேமிப்பின் அவசியம் கற்பிக்கப்பட வேண்டும். தண்ணீர் சேமிப்பு என்பது அரசாங்கத்தின் திட்டமாக மட்டும் இல்லாமல், மக்களின் வாழ்க்கை முறையாக மாற வேண்டும்.
நமது குழந்தைகளுக்கு நாம் விட்டுச் செல்லப்போவது என்ன?
நமது குழந்தைகளுக்காகச் சொத்துகளைச் சேர்க்கிறோம். நிலங்களை வாங்குகிறோம். வங்கிகளில் பணத்தைச் சேமிக்கிறோம். அவர்களின் எதிர்காலத்திற்காகப் பல திட்டங்களை வகுக்கிறோம். ஆனால் அவர்கள் வாழப்போகும் பூமியில் போதுமான குடிநீர் இருக்குமா என்று சிந்திக்கிறோமா? நாம் விட்டுச் செல்லும் சொத்துகளைவிட, நாம் பாதுகாத்து விட்டுச் செல்லும் இயற்கை வளங்கள்தான் அவர்களின் வாழ்க்கைக்கு மிக முக்கியமானவை. பணம் இல்லாத மனிதன் ஏழையாக இருக்கலாம். ஆனால் தண்ணீர் இல்லாத உலகில் அனைவருமே ஏழைகள்தான்!
JSR பார்வையில்
இயற்கை மனிதனிடம் ஒருபோதும் பணம் கேட்பதில்லை. ஆனால் மனிதன் இயற்கையிடமிருந்து அனைத்தையும் பெற்றுக்கொள்கிறான். காற்றைப் பெறுகிறான். தண்ணீரைப் பெறுகிறான். உணவைப் பெறுகிறான். வாழ்வதற்கான இடத்தையும் பெறுகிறான். ஆனால் அதற்குப் பதிலாக இயற்கைக்கு மனிதன் என்ன செய்கிறான்? காடுகளை அழிக்கிறான். நீர்நிலைகளை ஆக்கிரமிக்கிறான். ஆறுகளை மாசுபடுத்துகிறான். தண்ணீரை வீணாக்குகிறான்.
இப்படியே தொடர்ந்தால், எதிர்காலத் தலைமுறைகள் நம்மை மன்னிக்குமா? இன்று நாம் வீணாக்கும் ஒவ்வொரு சொட்டு நீருக்கும் நாளைய தலைமுறையிடம் பதில் சொல்ல வேண்டிய பொறுப்பு நமக்கு இருக்கிறது.ஒரு மனிதனின் உண்மையான செல்வம் அவன் வங்கிக் கணக்கில் இருக்கும் பணம் மட்டுமல்ல; அவன் வாழும் பூமியில் இருக்கும் இயற்கை வளங்களும்தான்! நமது குழந்தைகளுக்கு வெறும் சொத்துகளை மட்டும் விட்டுச் செல்ல வேண்டாம். சுத்தமான காற்றையும், பாதுகாப்பான சுற்றுச்சூழலையும், போதுமான குடிநீரையும் விட்டுச் செல்வோம்.
“நீரின்றி அமையாது உலகெனின் யார்யார்க்கும் வானின்று அமையாது ஒழுக்கு.” என்ற வள்ளுவரின் வாக்கிற்கு ஏற்ப,தண்ணீரைச் சேமிப்போம் இயற்கை வளங்களைப் பாதுகாப்போம்... நமது குழந்தைகளுக்கும், எதிர்காலச் சந்ததியினருக்கும் தாகமற்ற ஒரு உலகத்தை விட்டுச் செல்வோம்!தண்ணீரைப் பாதுகாப்போம்... மனிதகுலத்தின் எதிர்காலத்தைக் காப்போம்!






