← முகப்பு

சுற்றி சுற்றி ஆரத்தி எடுப்பதன் பின்னணி என்ன?

திருமணம், சுப நிகழ்ச்சிகள், வெளியூர் மற்றும் வெளிநாடுகளில் இருந்து வீடு திரும்புவோருக்கு ஆரத்தி எடுப்பது தமிழர் பண்பாட்டில் காலம் காலமாகப் பின்பற்றப்படும் ஒரு வழக்கம். கண் திருஷ்டி நீங்குவதற்காக ஆரத்தி எடுக்கப்படுவதாகப் பலரும் நம்புகின்றனர். ஆனால், இந்தப் பழக்கத்தின் வரலாற்றுப் பின்னணி என்ன? மஞ்சள், சுண்ணாம்பு, கற்பூரம் ஆகியவற்றைப் பயன்படுத்துவதற்கான காரணம் என்ன? இதில் உண்மையிலேயே அறிவியல் பலன்கள் இருக்கின்றனவா? விஞ்ஞானிகள் கூறுவது என்ன? என்பது குறித்து விரிவாகப் பார்க்கலாம்.

சுற்றி சுற்றி ஆரத்தி எடுப்பதன் பின்னணி என்ன?

தமிழர் பண்பாட்டிலும், இந்திய பாரம்பரியத்திலும் ஆரத்தி எடுப்பது முக்கியமான சடங்குகளில் ஒன்றாக இருந்து வருகிறது. குறிப்பாக, திருமணம், புதுமனை புகுவிழா, குழந்தைகளின் பிறந்தநாள், காதுகுத்து, வளைகாப்பு உள்ளிட்ட சுப நிகழ்ச்சிகளின்போது ஆரத்தி எடுப்பது தவிர்க்க முடியாத வழக்கங்களில் ஒன்று என கூறலாம்.

அதேபோல், வெளியூர் அல்லது வெளிநாடுகளுக்குச் சென்றுவிட்டு நீண்ட நாட்களுக்குப் பிறகு வீட்டுக்குத் திரும்புபவர்களுக்கும் ஆரத்தி எடுத்து வரவேற்பது வழக்கம். புதுமணத் தம்பதிகள் வீட்டிற்குள் நுழையும்போதும், முக்கியமான வெற்றிகளைப் பெற்றுத் திரும்புபவர்களுக்கும் ஆரத்தி எடுத்து வரவேற்பார்கள்.

Zamorra BNPD Shopping

Buy Now ! Pay Daily !

ஆனால், ஏன் ஆரத்தி எடுக்கிறோம் என்று கேட்டால், பெரும்பாலானோர் கண் திருஷ்டி கழிப்பதற்காக என்று பதிலளிப்பார்கள். உண்மையில், இந்தப் பழக்கத்திற்குப் பின்னால் பல்வேறு பண்பாட்டு மற்றும் வரலாற்றுக் காரணங்கள் இருக்கின்றன.

ஆரத்தியில் பயன்படுத்தப்படும் பொருட்கள் என்ன?

பொதுவாக ஆரத்தி எடுப்பதற்கு ஒரு தட்டில் தண்ணீர், மஞ்சள், சுண்ணாம்பு ஆகியவற்றைக் கலந்து பயன்படுத்துவார்கள். சில இடங்களில் குங்குமம், பூக்கள் மற்றும் கற்பூரத்தையும் பயன்படுத்துகின்றனர்.

மஞ்சள் மற்றும் சுண்ணாம்பு கலந்த நீர் சிவப்பு அல்லது ஆரஞ்சு நிறத்தில் மாறுவது ஆரத்தியில் முக்கியமான அம்சமாகும். இதனுடன் கற்பூரத்தை ஏற்றி, ஆரத்தி எடுக்கப்படும் நபரைச் சுற்றி மூன்று முறை அல்லது குறிப்பிட்ட எண்ணிக்கையில் சுற்றி எடுப்பார்கள்.

இந்தச் சடங்கில் பயன்படுத்தப்படும் ஒவ்வொரு பொருளுக்கும் பாரம்பரிய ரீதியாகத் தனித்துவமான முக்கியத்துவம் கொடுக்கப்படுகிறது. மஞ்சள்: இந்தியப் பாரம்பரியத்தில் மஞ்சள் மங்களகரமான பொருளாகக் கருதப்படுகிறது. மேலும், இதில் குர்குமின் (Curcumin) உள்ளிட்ட இயற்கை வேதிப்பொருட்கள் உள்ளன. ஆய்வகச் சூழலில் சில நுண்ணுயிர்களுக்கு எதிரான செயல்பாடுகளும் கண்டறியப்பட்டுள்ளன. சுண்ணாம்பு: இதில் கால்சியம் ஹைட்ராக்சைடு உள்ளது. இது காரத்தன்மை கொண்டது. மஞ்சளில் உள்ள குர்குமின் காரத்தன்மைக்கு உட்படும்போது சிவப்பு நிறத்தை நோக்கி மாறுகிறது. கற்பூரம்: கற்பூரம் எரியும்போது தனித்துவமான மணம் கொண்ட ஆவியாக மாறுகிறது. பாரம்பரியமாக இது தூய்மையின் அடையாளமாகப் பயன்படுத்தப்படுகிறது.

மஞ்சளும் சுண்ணாம்பும் ஏன் சிவப்பு நிறமாக மாறுகின்றன?

ஆரத்தி எடுக்கும்போது மஞ்சளுடன் சிறிதளவு சுண்ணாம்பு சேர்க்கப்பட்டு தண்ணீர் கலக்கப்படுகிறது. இதனால் அந்தக் கலவை சிவப்பு அல்லது செம்மஞ்சள் நிறமாக மாறுகிறது. இதற்குப் பின்னால் ஒரு வேதியியல் காரணம் இருக்கிறது.

மஞ்சளில் காணப்படும் குர்குமின் என்ற இயற்கை நிறமி, அமிலம் மற்றும் காரத்தன்மைக்கு ஏற்ப நிறத்தை மாற்றக்கூடியது. சுண்ணாம்பு சேர்க்கப்படும்போது கலவையின் காரத்தன்மை அதிகரிப்பதால் மஞ்சளின் நிறம் மாறுகிறது. இதே வேதியியல் மாற்றத்தை நாம் வீட்டிலும் எளிமையாகப் புரிந்துகொள்ள முடியும். உதாரணமாக, மஞ்சள் கலந்த நீரில் சிறிதளவு சுண்ணாம்பு சேர்த்துப் பார்த்தால் அதன் நிறம் சட்டென மாறும்.

இதனால் ஆரத்தியில் சிவப்பு நிறம் உருவாவது வெறும் அலங்காரத்திற்காக மட்டுமல்ல; அதற்குப் பின்னால் வேதியியல் மாற்றமும் இருக்கிறது.

ஆரத்தி எடுப்பதால் கிருமிகள் அழியுமா? அறிவியல் சொல்வது என்ன?

ஆரத்தி எடுப்பது குறித்து பொதுமக்களிடையே நிலவும் முக்கியமான நம்பிக்கைகளில் ஒன்று, இதனால் உடலில் அல்லது சுற்றுப்புறத்தில் இருக்கும் கிருமிகள் அழிக்கப்படுகின்றன என்பதாகும்.

வெளியூர்களில் இருந்து வருபவர்கள் பல இடங்களுக்குச் சென்று, பல மனிதர்களுடன் பழகி வீட்டிற்கு வருவதால் அவர்களுடன் கிருமிகளும் வரலாம். எனவே, அவர்களை வீட்டிற்குள் அனுமதிப்பதற்கு முன்பு ஆரத்தி எடுக்கும் வழக்கத்தை முன்னோர்கள் உருவாக்கியிருக்கலாம் என்று சிலர் விளக்குகின்றனர். ஆனால், இந்தக் கருத்துக்கு உறுதியான அறிவியல் ஆதாரங்கள் இல்லை.

குறிப்பாக, மஞ்சள் மற்றும் சுண்ணாம்பு கலந்த நீரை ஒருவரைச் சுற்றி எடுப்பதால் அவரைச் சுற்றியுள்ள காற்றில் இருக்கும் வைரஸ்கள், பாக்டீரியாக்கள் போன்ற நுண்ணுயிரிகள் அழிந்துவிடும் என்று நிரூபிக்கப்படவில்லை.

மஞ்சளில் சில நுண்ணுயிர்களுக்கு எதிரான பண்புகள் ஆய்வகச் சூழலில் கண்டறியப்பட்டிருந்தாலும், அதைப் பயன்படுத்தி ஆரத்தி எடுப்பது காற்றை கிருமி நீக்கம் செய்யும் என்பதற்கு அது ஆதாரமாகாது. அதேபோல், கற்பூரம் எரிவதால் உருவாகும் வெப்பம் அல்லது மணம் வீட்டில் உள்ள அனைத்து கிருமிகளையும் அழித்துவிடும் என்றும் கூற முடியாது.

உதாரணமாக, ஒருவர் சளி அல்லது காய்ச்சலுடன் வீட்டிற்கு வந்தால் அவரைச் சுற்றி ஆரத்தி எடுப்பதால் நோய்த்தொற்று பரவுவதைத் தடுக்க முடியாது. அதற்குப் பதிலாக கைகளைச் சுத்தமாகக் கழுவுதல், காற்றோட்டமான இடத்தில் இருப்பது, தேவையானபோது முகக்கவசம் அணிவது போன்ற நடைமுறைகளே நோய்த்தொற்று தடுப்புக்கு உதவும்.

போருக்குச் சென்ற வீரர்களுக்கும் ஆரத்தி எடுத்தார்களா?

ஆரத்தி எடுக்கும் வழக்கத்திற்குப் பின்னால் வரலாற்று ரீதியான காரணங்களும் இருப்பதாகக் கூறப்படுகிறது. பண்டைய காலங்களில் போர்களுக்குச் செல்லும் வீரர்கள் வெற்றியுடன் திரும்ப வேண்டும் என்பதற்காக அவர்களை வழியனுப்பும்போது சடங்குகள் செய்யப்பட்டதாகவும், போரில் வெற்றி பெற்று நாடு திரும்பிய வீரர்களுக்கு ஆரத்தி எடுத்து வரவேற்றதாகவும் வரலாற்று மற்றும் பண்பாட்டு ஆய்வுகளில் விளக்கப்படுகிறது.

இது வீரத்தையும் வெற்றியையும் கொண்டாடும் அடையாளமாகவும், வீரர்களுக்கு மரியாதை செலுத்தும் முறையாகவும் இருந்திருக்கலாம். காலப்போக்கில், இந்த வழக்கம் குடும்ப நிகழ்ச்சிகள், திருமணங்கள் மற்றும் சுப நிகழ்ச்சிகளிலும் இடம்பெறத் தொடங்கியிருக்கலாம். இருப்பினும், ஆரத்தி வழக்கம் ஒரே ஒரு வரலாற்றுக் காரணத்திலிருந்து உருவானது என்று உறுதியாகக் கூற முடியாது.

**ஆரத்தி எடுப்பதில் வேறு என்ன அர்த்தம் இருக்கிறது?**

ஆரத்தி என்பது வெறும் கண் திருஷ்டி கழிக்கும் சடங்கு மட்டுமல்ல. ஒருவரை அன்புடன் வரவேற்பது, அவருடைய நலனுக்காக வாழ்த்துவது, குடும்பத்தில் மகிழ்ச்சியை வெளிப்படுத்துவது போன்ற சமூக மற்றும் உணர்வுப்பூர்வமான அர்த்தங்களையும் கொண்டுள்ளது.

உதாரணமாக, வெளிநாட்டில் பல ஆண்டுகள் வேலை பார்த்துவிட்டு ஒருவர் சொந்த ஊருக்குத் திரும்பும்போது குடும்பத்தினர் ஆரத்தி எடுத்து வரவேற்பது அவர்களுடைய மகிழ்ச்சியையும் அன்பையும் வெளிப்படுத்துகிறது. அதேபோல், திருமணத்தில் மணமக்களை ஆரத்தி எடுத்து வரவேற்பது புதிய வாழ்க்கையைத் தொடங்கும் அவர்களுக்கு குடும்பத்தினர் அளிக்கும் வாழ்த்தாகவும் பார்க்கப்படுகிறது.

மொத்தத்தில், ஆரத்தி எடுப்பதற்குப் பின்னால் பாரம்பரியம், வரலாறு, வேதியியல் மாற்றம் மற்றும் சமூகப் பழக்கவழக்கங்கள் எனப் பல அம்சங்கள் உள்ளன. ஆனால், ஆரத்தி எடுப்பதால் கிருமிகள் அழியும் என்ற கருத்துக்கு இதுவரை உறுதியான அறிவியல் ஆதாரம் இல்லை என்பதே நிதர்சமான உண்மை.

Zamorra BNPD Shopping

Buy Now ! Pay Daily !