வதந்திகள் உருவான பின்னணி
நடிகர் அர்ஜுனின் இளைய மகள் அஞ்சனா திருமணம் சமீபத்தில் நடைபெற்றது. இந்தத் திருமண நிகழ்வு தொடர்பான புகைப்படங்களும் காணொளிகளும் வெளியானபோது, அதில் அர்ஜுனின் மூத்த மகளான ஐஸ்வர்யா தனியாகக் கலந்து கொண்டதை வைத்துப் பல யூகங்கள் கிளம்பின. நடிகர் தம்பி ராமையாவின் மகன் உமாபதி மற்றும் ஐஸ்வர்யா ஆகியோரின் திருமண வாழ்க்கை குறித்து எந்தவொரு அதிகாரபூர்வ அறிவிப்போ, பிரிவு குறித்த தகவலோ இரு தரப்பிலிருந்தும் வெளியிடப்படாத நிலையிலும், சில சமூக வலைதளப் பக்கங்களும் யூடியூப் சேனல்களும் விவாகரத்து மற்றும் தனிப்பட்ட விவகாரங்கள் குறித்துத் தொடர்ந்து விவாதித்து வந்தன.
Buy Now ! Pay Daily !
இந்தத் தொடர் விவாதங்கள் மற்றும் அவதூறுகளுக்கு முற்றுப்புள்ளி வைக்கும் விதமாக அர்ஜுன் அறிக்கை ஒன்றை வெளியிட்டுள்ளார். இளைய மகள் அஞ்சனாவின் திருமணத்தை முன்னிட்டு வாழ்த்துத் தெரிவித்த அனைவருக்கும் குடும்பத்தினர் சார்பில் நன்றி தெரிவித்த அர்ஜுன், இதுபோன்ற ஒரு சூழலில் பொதுவெளியில் கருத்து தெரிவிக்க வேண்டிய நிலை வரும் என்று தாம் எதிர்பார்க்கவில்லை எனக் குறிப்பிட்டுள்ளார். மூத்த மகள் ஐஸ்வர்யாவின் தனிப்பட்ட வாழ்க்கையில் தலையிடாமல், அவரது தனியுரிமைக்கு மதிப்பளித்து இதுவரை அமைதி காத்து வந்ததாகக் கூறியுள்ளார். ஒவ்வொரு பெண்ணுக்கும் சுதந்திரமாக வாழவும், தமக்கு விருப்பமான முடிவுகளை எடுக்கவும் உரிமை உண்டு என்றும், தேவைப்பட்டால் அவரே உரிய நேரத்தில் விளக்கம் அளிப்பார் என்றும் தெளிவுபடுத்தியுள்ளார்.
ஒரு தந்தையாக, தம் மகளையும் அவரது குணத்தையும் குறிவைத்து முன்வைக்கப்படும் ஆதாரமற்ற, இழிவான குற்றச்சாட்டுகளைக் கண்டு அமைதியாக இருக்க முடியாது எனத் தெரிவித்துள்ளார். குறிப்பாக, எந்தவித ஆதாரமும் இல்லாமல் ஒரு பெண்ணை மதுப்பழக்கத்திற்கு அடிமையானவர் என முத்திரை குத்துவது போன்ற செயல்கள் பொறுப்பற்றவை என்றும் ஏற்றுக்கொள்ள முடியாதவை என்றும் கண்டித்துள்ளார்.
மௌனம் காப்பது கண்ணியமான அணுகுமுறையாகக் கருதப்பட்டாலும், அதைத் தவறான தகவல்களைப் பரப்புவதற்கான அனுமதியாகக் கருதக் கூடாது என எச்சரித்துள்ளார். இது தொடர்பாகச் சம்பந்தப்பட்ட அதிகாரிகளிடம் முறையான புகார் அளிக்கப்பட்டு உரிய நடவடிக்கை எடுக்கப்பட்டுள்ளதாகவும், எதிர்காலத்திலும் அவதூறுகள் தொடர்ந்தால் சட்டரீதியான நடவடிக்கை முன்னெடுக்கப்படும் என்றும் அறிவித்துள்ளார்.
பத்திரிகைத் துறையின் பணியை மதிப்பதாகக் குறிப்பிட்ட போதிலும், பார்வைகளை ஈர்ப்பதற்காக உண்மைத்தன்மை இன்றித் தனிப்பட்ட தாக்குதல்களை முன்வைக்கும் சில ஊடகப் பிரிவுகளின் போக்கை அவர் வருத்தத்துடன் சுட்டிக்காட்டியுள்ளார். இந்த விவகாரம் தனது மகளுக்கு மட்டும் உரியது அல்ல எனக் குறிப்பிட்டுள்ள அர்ஜுன், பெண்களின் தனிப்பட்ட தேர்வுகள் மற்றும் கண்ணியம் பொதுவெளியில் கேள்விக்குள்ளாக்கப்படுவதற்கு எதிரான கருத்தையும் முன்வைத்துள்ளார். குடும்பத்தின் ஆதரவு இல்லாத பெண்களுக்கு இதுபோன்ற வதந்திகள் மிகுந்த மன உளைச்சலையும் சிக்கல்களையும் உருவாக்கும் என்பதைச் சுட்டிக்காட்டி, எந்தவொரு பெண்ணும் தாம் வாழும் வாழ்க்கைக்காகத் தன்னைத்தானே நியாயப்படுத்திக் கொள்ள வேண்டிய சூழல் இருக்கக் கூடாது என வலியுறுத்தியுள்ளார்.






