இந்த விவகாரம் தொடர்பாகத் தென்கிழக்கு ரயில்வே (South Eastern Railway) தீவிர விசாரணைக்கு உத்தரவிட்டுள்ள நிலையில், ரயில்வே துறையின் பல்வேறு மட்டங்களில் நடந்துள்ள முறைகேடுகள் மற்றும் அலட்சியப் போக்குகள் குறித்த விரிவான தகவல்கள் வெளியாகியுள்ளன.
என்ன நடந்தது? சம்பவத்தின் பின்னணி
Buy Now ! Pay Daily !
கடந்த அக்டோபர் மாதம், ஜார்க்கண்ட் மாநிலம் ஹட்டியா பகுதியில் இருந்து உத்தரப்பிரதேச மாநிலம் சந்தாலி மாவட்டத்தில் உள்ள தீன் தயாள் உபாத்யாயா ரயில் நிலையம் செல்லும் வந்தே பாரத் ரயிலில் தான் இந்தச் சம்பவம் அரங்கேறியுள்ளது. ஹட்டியா நிலையத்திலிருந்து ரயில் புறப்பட்ட பிறகு, வழக்கம் போல் ஓட்டுநர் பிரேக் ஆற்றல் சோதனையை (Brake Power Test) மேற்கொண்டார். அப்போது ரயிலின் பிரேக் செயல்பாடு மிக மோசமாக இருப்பதைக் கண்டு அவர் அதிர்ந்து போனார். ராஞ்சி ரயில் நிலையத்தை அடைந்ததும், ஓட்டுநர் இது குறித்துப் பிரிவு கட்டுப்பாட்டாளர் மற்றும் இழுவை லோக்கோ கட்டுப்பாட்டாளரிடம் எழுத்துப்பூர்வமாகப் புகார் அளித்தார். ஆனால், முறையான பாதுகாப்பு சோதனைகளை மேற்கொள்ளாமல், ரயிலை அதே பழுதான நிலையிலேயே தொடர்ந்து இயக்க அதிகாரிகள் அனுமதித்துள்ளனர்.
மீண்டும் எச்சரித்த லோக்கோ பைலட்
அதன் பிறகு முரி (Muri) ரயில் நிலையத்தில் இருந்து ரயிலை இயக்கிய மற்றொரு லோக்கோ பைலட்டும், பிரேக் பைப்பில் அழுத்தம் குறைவதன் மூலம் பிரேக்குகளை இயக்க முடியவில்லை என்பதைத் தொடர்புடைய கட்டுப்பாட்டாளர்களுக்குத் தகவல் தெரிவித்தார். இருப்பினும், யாருமே அதைக் தீவிரமாக எடுத்துக் கொள்ளவில்லை.
எப்படித் கண்டுபிடிக்கப்பட்டது?
ரயில் இரண்டு மாநிலங்களைக் கடந்து, உத்தரப்பிரதேசத்தில் உள்ள தீன் தயாள் உபாத்யாயா நிலையத்தை அடைந்த பின்னர்தான் அதிகாரிகள் விழிப்படைந்தனர். அங்கு ரயிலை முழுமையாக ஆய்வு செய்தபோதுதான் பேரதிர்ச்சி காத்திருந்தது. ரயிலில் உள்ள அனைத்து பெட்டிகளின் பிரேக் அமைப்புகளும் தனிமைப்படுத்தப்பட்டு செயலிழக்கச் செய்யப்பட்டிருந்தது கண்டுபிடிக்கப்பட்டது. அதாவது, பெட்டிகளின் பிரேக் அமைப்பு எந்தவிதக் கட்டுப்பாட்டிலும் இல்லாமல் துண்டிக்கப்பட்டிருந்தது.
எதன் மூலம் ரயில் இயக்கப்பட்டது?
பெட்டிகளின் பிரேக்குகள் வேலை செய்யாததால், என்ஜினின் சொந்த பிரேக்குகள் மற்றும் 'ரீஜெனரேட்டிவ் பிரேக்கிங்' தொழில்நுட்பத்தை மட்டுமே நம்பி அந்த ரயில் சுமார் 463 கி.மீ. தூரம் ஆபத்தான முறையில் இயக்கப்பட்டிருப்பது விசாரணையில் தெரியவந்துள்ளது. அதிர்ஷ்டவசமாக பெரிய விபத்து ஏதும் ஏற்படாவிட்டாலும், இந்த சம்பவம் மற்ற பயணிகள் ரயில்களின் பாதுகாப்பிற்கும் பெரும் அச்சுறுத்தலாக அமைந்திருந்தது.
முதற்கட்ட விசாரணையில் கண்டறியப்பட்ட முக்கியக் குறைபாடுகள்
தென்கிழக்கு ரயில்வேயின் ராஞ்சி கோட்ட மேலாளருக்கு அனுப்பப்பட்ட உத்தரவின் அடிப்படையில் நடத்தப்பட்ட முதற்கட்ட விசாரணையில், பல தரப்பினரின் பொறுப்பற்ற தன்மை அம்பலமாகியுள்ளது. ரெயில் புறப்படுவதற்கு முன்பு வண்டி மற்றும் பெட்டிப் பராமரிப்பு ஊழியர்கள், பிரேக் சரியாக வேலை செய்கிறதா என்பதை நேரில் சென்று முறையாகச் சரிபார்க்கத் தவறியுள்ளனர். ஓட்டுநர்கள் மூலம் பிரேக் பழுது குறித்துத் தகவல்கள் வந்தும் கூட, செக்ஷன் மற்றும் டிராக்ஷன் கட்டுப்பாட்டாளர்கள் எந்தவித நடவடிக்கையும் எடுக்காமல் ரயிலை இயக்க அனுமதித்துள்ளனர். வந்தே பாரத் ரயிலின் அதிநவீன பிரேக் அமைப்புகள் குறித்துப் பணியில் இருந்த ரயில் ஊழியர்களுக்கும் குழுவினருக்கும் போதிய புரிதலும் பரிச்சயமும் இல்லாததும் இந்தத் தவறுக்கு முக்கியக் காரணமாகச் சுட்டிக்காட்டப்பட்டுள்ளது.
ரயில்வே துறையின் அடுத்த கட்ட நடவடிக்கை
தொடர் ரயில் விபத்துகளும் பாதுகாப்புச் சீர்குலைவுகளும் விவாதிக்கப்பட்டு வரும் சூழலில் நடந்துள்ள இந்தச் சம்பவம் ரயில்வே துறையில் பெரும் பரபரப்பை ஏற்படுத்தியுள்ளது. இந்தத் தவறுக்குக் காரணமான ஊழியர்கள் மற்றும் அதிகாரிகள் யார் என்பதைக் கண்டறிந்து அவர்கள் மீது கடுமையான துறைசார் நடவடிக்கை எடுக்கவும், எதிர்காலத்தில் இதுபோன்ற ஆபத்தான சம்பவங்கள் மீண்டும் நடைபெறாமல் இருக்கத் தேவையான தடுப்பு நடவடிக்கைகளை மேற்கொள்ளவும் தென்கிழக்கு ரயில்வே உத்தரவிட்டுள்ளது.






