← முகப்பு

நான் உயிருடன் திரும்ப மாட்டேன் என்று தோன்றுகிறது!

பாகிஸ்தானின் முன்னாள் பிரதமரும், பாகிஸ்தான் தெஹ்ரீக்-இ-இன்சாப் கட்சியின் நிறுவனருமான இம்ரான் கான், சிறைச்சாலையில் தனக்கு அளிக்கப்படும் கடுமையான தனிமைச் சிறைவாசம் மற்றும் போதிய மருத்துவ வசதியின்மை காரணமாகத் தனது உயிருக்கு ஆபத்து ஏற்பட்டுள்ளதாகத் தெரிவித்து, அந்நாட்டின் உச்ச நீதிமன்றம் உள்ளிட்ட உயர் நீதிமன்றங்களுக்கு உருக்கமான திறந்த மடல் ஒன்றை எழுதியுள்ளார்.

நான் உயிருடன் திரும்ப மாட்டேன் என்று தோன்றுகிறது!

2023-ஆம் ஆண்டு ஆகஸ்ட் மாதம் முதல் பல்வேறு வழக்குகளில் கைது செய்யப்பட்டு ராவல்பிண்டியில் உள்ள அடியாலா சிறையில் அடைக்கப்பட்டுள்ள இம்ரான் கான், தனது வழக்கறிஞர் சல்மான் சஃப்தார் மூலமாக இந்தக் கடிதத்தை வெளியிட்டுள்ளார். நவம்பர் 11-ஆம் தேதி சிறையில் தன்னைச் சந்தித்த வழக்கறிஞரிடம், தனது உடல்நிலை மற்றும் சிறை நிலைமைகள் குறித்த வேதனையைப் பாகிஸ்தான் உச்ச நீதிமன்றத் தலைமை நீதிபதி, கூட்டாட்சி அரசியலமைப்பு நீதிமன்றம் மற்றும் இஸ்லாமாபாத் உயர் நீதிமன்றத் தலைமை நீதிபதிகளின் கவனத்திற்குக் கொண்டு செல்லுமாறு இம்ரான் கான் அறிவுறுத்தியிருந்தார். அதன்படி, நவம்பர் 16-ஆம் தேதி சமூக வலைதளமான 'எக்ஸ்' தளத்தில் இக்கடிதம் பொதுமக்களின் பார்வைக்கு வெளியிடப்பட்டது.

எக்ஸ் பதிவில் அவர் கூறியதாவது:

Zamorra BNPD Shopping

Buy Now ! Pay Daily !

  • “வசதியற்ற ஏழை எளிய மக்களுக்கு இலவச மருத்துவ சிகிச்சை கிடைக்க வேண்டும் என்பதற்காக மருத்துவமனைகளைக் கட்டுவதிலேயே என் வாழ்நாளைச் செலவிட்டேன். ஆனால் இன்று, எனக்கும் என் மனைவிக்கும் உரிய சிகிச்சை அளிக்க வேண்டும் என்ற ஒற்றைக் கோரிக்கையை மட்டுமே முன்வைக்கிறேன்.”
  • சிறைச்சாலை நிர்வாகம் தன்னை வெளி உலகத் தொடர்புகளிலிருந்து முற்றிலுமாகத் துண்டித்து வைத்துள்ளதாக இம்ரான் கான் குற்றம் சாட்டியுள்ளார். இது குறித்து அவர் குறிப்பிட்டுள்ள முக்கிய அம்சங்கள்:
  • ஒரு நாளைக்கு சுமார் 22 மணி நேரம் வரை தனிமைச் சிறையில் அடைத்து வைக்கப்படுவதாகவும், இது தனது மனநலனைக் கடுமையாகப் பாதித்து வருவதாகவும் அவர் குறிப்பிட்டுள்ளார்.
  • குடும்பத்தினரைச் சந்திக்கவோ, வெளிநாட்டில் உள்ள தனது மகன்களுடன் தொலைபேசியில் பேசவோ, புத்தகங்கள் வாசிக்கவோ அல்லது தொலைக்காட்சி பார்க்கவோ அனுமதி மறுக்கப்பட்டுள்ளது.
  • சிறைக் காவலர்கள் தன்னிடம் பேசுவதற்குக் கூட தடை விதிக்கப்பட்டுள்ளதாகவும், தான் 'சலாம்' (வணக்கம்) கூறும்போதோ அல்லது திருக்குர்ஆன் வசனங்களை ஓதும்போதோ கூட யாரும் பதிலளிக்க அனுமதிக்கப்படுவதில்லை என்றும் அவர் வேதனை தெரிவித்துள்ளார். தன்னை நோய்வாய்ப்படச் செய்து, மன உறுதியைக் குலைக்கும் நோக்கிலேயே இத்தகைய கட்டுப்பாடுகள் விதிக்கப்பட்டுள்ளதாக அவர் குற்றம் சாட்டியுள்ளார்.
  • சிறை மருத்துவ வாரியம் தனது பதற்றம் மற்றும் மன அழுத்தத்தைப் பதிவு செய்து, மனைவி மற்றும் குடும்பத்தினருடன் அடிக்கடி உரையாடவும், புத்தகங்கள் மற்றும் தொலைக்காட்சி வசதி அளிக்கவும் பரிந்துரைத்தபோதிலும், சிறை நிர்வாகம் அதனைச் செயல்படுத்தவில்லை என்று அவர் சுட்டிக்காட்டியுள்ளார்.
  • கடந்த ஓராண்டில் தனது வழக்கறிஞரை நான்கு முறை மட்டுமே சந்திக்க அனுமதித்ததாகவும், தனது மனைவி புஷ்ரா பீபி தனது வழக்கறிஞரை ஒரே ஒரு முறை மட்டுமே சந்திக்க முடிந்ததாகவும் கடிதத்தில் கூறப்பட்டுள்ளது.

அபாயகரமான உடல்நிலை மற்றும் பார்வை இழப்பு

தனது உடல்நிலை நாளுக்கு நாள் மோசமடைந்து வருவதை விளக்கியுள்ள 74 வயதான இம்ரான் கான், உயிருக்கு ஆபத்தான அறிகுறிகள் தென்படுவதாக எச்சரித்துள்ளார். சிறைவாசத்தின் போது தனது ரத்த அழுத்தம் 130-லிருந்து 150 ஆகவும், பின்னர் 170 ஆகவும் படிப்படியாக உயர்ந்து, நவம்பர் 10-ஆம் தேதி 192 மற்றும் 193 என்ற அபாயகரமான அளவை எட்டியதாக அவர் தெரிவித்துள்ளார். இந்தத் தொடர் உயர் ரத்த அழுத்தத்தால் மூளை ரத்தக்கசிவுமற்றும் மாரடைப்பு ஏற்படுவதற்கான வாய்ப்பு மிக அதிகமாக உள்ளதாகவும், தனது இதயம் ஏற்கனவே பாதிக்கப்பட்டுள்ளதாகவும் மருத்துவர்கள் எச்சரித்துள்ளதாக அவர் குறிப்பிட்டுள்ளார். கடந்த பிப்ரவரி 10-ஆம் தேதி வழக்கறிஞர் சந்திப்பின் போது, தனது வலது கண்ணில் 85 சதவீதப் பார்வை பறிபோயிருப்பது தெரியவந்ததாகவும், இது குறித்துத் தனது குடும்பத்தினருக்கோ அல்லது வழக்கறிஞர்களுக்கோ முன்கூட்டியே எந்தத் தகவலும் தெரிவிக்கப்படவில்லை என்றும் அவர் குற்றம் சாட்டியுள்ளார்.

மனைவி புஷ்ரா பீபியின் பார்வை பறிபோகும் அபாயம்

2025 ஜனவரி மாதம் வேறு ஒரு வழக்கில் கைது செய்யப்பட்டுச் சிறையில் அடைக்கப்பட்டுள்ள தனது மனைவி புஷ்ரா பீபியின் உடல்நிலை குறித்தும் இம்ரான் கான் ஆழ்ந்த கவலை தெரிவித்துள்ளார். கடந்த ஏப்ரல் மாதம் புஷ்ரா பீபிக்கு விழித்திரை விலகல் ஏற்பட்டதைத் தொடர்ந்து, ரகசியமான முறையில் சிக்கலான கண் அறுவை சிகிச்சை செய்யப்பட்டு மீண்டும் தனிமைச் சிறைக்குக் கொண்டு செல்லப்பட்டதாக அவர் தெரிவித்துள்ளார். சமீபத்தில் அவரைச் சந்தித்தபோது, அவரால் வெளிச்சத்தைப் பார்க்கவோ, கண்களைத் திறக்கவோ முடியவில்லை என்றும், உடனடியாக மற்றொரு அறுவை சிகிச்சை செய்யாவிட்டால் அவர் நிரந்தரமாகப் பார்வையை இழக்க நேரிடும் என்றும் இம்ரான் கான் எச்சரித்துள்ளார். புஷ்ரா பீபியின் மருத்துவ அறிக்கைகள் மறைக்கப்படுவதாகவும், தனிப்பட்ட முறையில் சிறந்த கண் மருத்துவர்களிடம் சிகிச்சை பெற அனுமதி கோரி அவரும் நீதிமன்றத்தை நாடியுள்ளதாகவும் தகவல்கள் தெரிவிக்கின்றன.

குடும்பத்தினர் மற்றும் அரசாங்கத்தின் எதிர்வினை

இம்ரான் கானின் மகன்கள் காசிம் கான் மற்றும் சுலைமான் கான் ஆகியோர் இக்கடிதத்தைக் கண்டு மிகுந்த அதிர்ச்சியடைந்துள்ளனர். சிறைக்குள் தனது தந்தைக்கு உடல் ரீதியாகவும் மன ரீதியாகவும் சித்திரவதை அளிக்கப்படுவதாகவும், உடனடியாகத் தனியார் மருத்துவமனையில் அனுமதித்துச் சிகிச்சை அளிக்காவிட்டால் சிறைக்குள்ளேயே அவரது உயிருக்கு ஆபத்து ஏற்படுவது தவிர்க்க முடியாததாகிவிடும் என்றும் அவர்கள் எச்சரித்துள்ளனர். மறுபுறம், பாகிஸ்தான் நாடாளுமன்ற விவகாரத் துறை அமைச்சர் தாரிக் ஃபசல் சவுத்ரி, இம்ரான் கானின் குற்றச்சாட்டுகளை மறுத்துள்ளார். சிறையில் மருத்துவ வசதிகள் மற்றும் அடிப்படைத் தேவைகள் மறுக்கப்படுவதாகக் கூறப்படும் தகவல்கள் உண்மைக்குப் புறம்பானவை என்று அவர் விளக்கமளித்துள்ளார். தனது கடிதத்தின் இறுதியில், வழக்குகளில் இருந்து தப்பிப்பதற்காகத் தான் மருத்துவக் காரணங்களைக் கூறவில்லை என்றும், தன் மீதான குற்றச்சாட்டுகளைச் சட்டரீதியாக எதிர்கொண்டு நிரபராதி என்பதை நிரூபிக்க தான் உயிருடன் இருக்க வேண்டியது அவசியம் என்றும் இம்ரான் கான் குறிப்பிட்டுள்ளார். உச்ச நீதிமன்றத்தின் முந்தைய உத்தரவுகளை நடைமுறைப்படுத்தி, தாமதமாவதற்கு முன்பாக மனிதாபிமான அடிப்படையில் தங்களுக்கு உரிய மருத்துவ சிகிச்சை அளிக்க நீதிபதிகள் தலையிட வேண்டும் என அவர் கோரிக்கை விடுத்துள்ளார்.

Zamorra BNPD Shopping

Buy Now ! Pay Daily !