அடுத்து வரப்போகும் 2031 உலக கோப்பைத் தொடர் மற்றும் 2029 சாம்பியன்ஸ் ட்ராபி தொடர்களை நடத்தப்போகும் நாடு மற்றும் கால அட்டவணை தயாரிக்கும் கூட்டம் இந்தோனேஷியாவின் பாலி நகரில் நடந்தது. மேலும் அடுத்த ஐசிசி தலைவரை தேர்ந்தெடுக்கும் ஐசிசி வாரிய இயக்குனர்கள் கூட்டமும் நடந்தது. இக்கூட்டத்தில் ஐசிசி வாரியத்தின் இயக்குநர்கள் முன்மொழிந்த பரிந்துரையின் அடிப்படையில், உள்துறை அமைச்சர் அமித் ஷா வின் மகனும், நடப்பு ஐசிசியின் தலைவராகவும் உள்ள ஜெய் ஷாவை எதிர்த்து யாரும் வேட்புமனு தாக்கல் செய்யாததால் அவர் போட்டியின்றித் தேர்ந்தெடுக்கப்பட்டார். முன்னதாக, நியூசிலாந்தைச் சேர்ந்த கிரெக் பார்க்லே தனது பதவியிலிருந்து விலகியதைத் தொடர்ந்து, 2024-ஆம் ஆண்டு டிசம்பர் 1-ஆம் தேதி ஜெய் ஷா முதன்முறையாக ஐசிசி தலைவராகப் பொறுப்பேற்றார். அப்போது ஐசிசி வரலாற்றிலேயே மிக இளம் வயதுத் தலைவர் என்ற பெருமையையும் அவர் பெற்றிருந்தார். தற்போது இரண்டாவது முறையாகத் தேர்ந்தெடுக்கப்பட்டுள்ளதன் மூலம், உலக கிரிக்கெட் நிர்வாகத்தில் அவரின் தலைமைத்துவத்திற்கு உறுப்பு நாடுகளிடையே இருக்கும் முழுமையான ஆதரவும் நம்பிக்கையும் உறுதியாகியுள்ளது.
ஜெய் ஷாவின் முக்கிய இலக்குகளும் எதிர்காலத் திட்டங்களும்
Buy Now ! Pay Daily !
தனது மறுநியமனம் குறித்துக் கருத்துத் தெரிவித்த ஜெய் ஷா, தனக்குத் தொடர்ந்து ஆதரவளித்து வரும் ஐசிசி வாரிய உறுப்பினர்களுக்கு தனது நன்றியைத் தெரிவித்துக்கொண்டார். மேலும், தனது அடுத்த பதவிக்காலத்தில் அவர் கவனம் செலுத்தவுள்ள முக்கிய அம்சங்கள் பின்வருமாறு:
- ஒலிம்பிக் போட்டிகளில் கிரிக்கெட்: 1900-ஆம் ஆண்டிற்குப் பிறகு சுமார் ஒரு நூற்றாண்டு கால இடைவெளிக்குப் பின், 2028 லாஸ் ஏஞ்சல்ஸ் ஒலிம்பிக் (LA28) போட்டிகளில் கிரிக்கெட் மீண்டும் இடம்பெறவுள்ளது. இந்த வரலாற்றுச் சிறப்புமிக்க நிகழ்வின் மூலம் உலகளவில் புதிய ரசிகர்களைக் கவர்வதும், கிரிக்கெட்டைப் புதிய நாடுகளுக்குக் கொண்டு செல்வதும் இவரது முதன்மை இலக்காக உள்ளது.
- மகளிர் கிரிக்கெட்டின் வளர்ச்சியை அடுத்த கட்டத்திற்கு எடுத்துச் செல்வதோடு, 2027-ஆம் ஆண்டு ஆப்பிரிக்காவில் நடைபெறவுள்ள ஐசிசி ஆடவர் ஒருநாள் உலகக் கோப்பைப் போட்டியை வெற்றிகரமாக நடத்தி, ஆப்பிரிக்கக் கண்டத்தில் கிரிக்கெட்டின் அடித்தளத்தை வலுப்படுத்தத் திட்டமிடப்பட்டுள்ளது.
- சர்வதேச கிரிக்கெட்டின் நேர்மையைப் பாதுகாப்பது, உறுப்பு நாடுகளுக்கு (Associate Members) அதிக வாய்ப்புகள் மற்றும் முதலீடுகளை உருவாக்குவது, மற்றும் நிலையான வணிக வாய்ப்புகளைப் பெருக்குவது ஆகியவை ஐசிசியின் முக்கிய செயல்திட்டங்களாக அறிவிக்கப்பட்டுள்ளன.
கிரிக்கெட் உலகின் வரவேற்பு
ஜெய் ஷாவின் இந்த மறுநியமனத்திற்கு உலக கிரிக்கெட் நிர்வாகிகளும் வீரர்களும் தங்களது வாழ்த்துகளைத் தெரிவித்துள்ளனர். இங்கிலாந்து மற்றும் வேல்ஸ் கிரிக்கெட் வாரியத்தின் (ECB) தலைவர் ரிச்சர்ட் தாம்சன், சர்வதேச கிரிக்கெட்டின் அடுத்த கட்ட வளர்ச்சியில் ஜெய் ஷாவுடன் இணைந்து பணியாற்ற ஆவலாக இருப்பதாகக் குறிப்பிட்டுள்ளார். மேலும், இந்திய அணியின் தலைமைப் பயிற்சியாளர் கௌதம் கம்பீர், பிசிசிஐ தலைவர் மிதுன் மன்ஹாஸ் மற்றும் சூர்யகுமார் யாதவ், ஜஸ்பிரித் பும்ரா உள்ளிட்ட இந்திய வீரர்களும் ஜெய் ஷாவின் தலைமையில் கிரிக்கெட் புதிய உயரங்களை எட்டும் என நம்பிக்கை தெரிவித்துள்ளனர். ஜக்மோகன் டால்மியா, சரத் பவார், என். சீனிவாசன் மற்றும் சஷாங்க் மனோகர் ஆகியோருக்குப் பிறகு சர்வதேச கிரிக்கெட் கவுன்சிலுக்குத் தலைமை தாங்கும் ஐந்தாவது இந்தியர் ஜெய் ஷா என்பது குறிப்பிடத்தக்கது.






