விறுவிறுப்பாக நடைபெற்று வரும் படப்பிடிப்பு
‘டேர் டெவில்’ திரைப்படத்தை அஜித்தின் மனைவியும், பிரபல நடிகையுமான ஷாலினி அஜித் தனது ‘பிரேவ் ஹார்ட்ஸ் புரொடக்ஷன்ஸ்’ நிறுவனம் மூலம் பிரம்மாண்டமாகத் தயாரிக்கிறார். அதிரடி ஆக்ஷன் த்ரில்லர் பாணியில் உருவாகும் இப்படத்தில் அஜித்துடன் முதன்முறையாக இளம் நடிகை ஸ்ரீலீலா ஜோடி சேர்ந்துள்ளார். இவர்களுடன் மலையாள நடிகர் உன்னி முகுந்தன், மூத்த நடிகர்கள் பிரபு, பார்த்திபன், மற்றும் சுனில், ரெடின் கிங்ஸ்லி ஆகியோரும் முக்கியக் கதாபாத்திரங்களில் நடிக்கின்றனர். இப்படத்திற்கு ராக்ஸ்டார் அனிருத் ரவிச்சந்தர் இசையமைக்கிறார். இப்படத்தின் பூஜை கடந்த நவம்பர் 2-ஆம் தேதி சென்னையில் எளிமையாக நடைபெற்றது. அதனைத் தொடர்ந்து, நவம்பர் 12-ஆம் தேதி ஹைதராபாத்தில் உள்ள ராமோஜி ஃபிலிம் சிட்டியில் முதற்கட்டப் படப்பிடிப்பு தொடங்கி விறுவிறுப்பாக நடைபெற்று வருகிறது. தற்போது இரவு நேரப் படப்பிடிப்பாக சண்டைக் காட்சிகள் படமாக்கப்பட்டு வருகின்றன. இதில் பிரபு, பார்த்திபன் மற்றும் ஸ்ரீலீலா ஆகியோர் பங்கேற்று நடித்து வருகின்றனர். ஹைதராபாத் படப்பிடிப்பு சுமார் 30 நாட்கள் (டிசம்பர் வரை) நடைபெறும். அதன்பின் 5 நாட்கள் இடைவெளிக்குப் பிறகு, அடுத்தகட்டப் படப்பிடிப்பிற்காகப் படக்குழு வெளிநாடு செல்லத் திட்டமிட்டுள்ளது. 2027-ஆம் ஆண்டு பிப்ரவரி மாதத்திற்குள் ஒட்டுமொத்தப் படப்பிடிப்பையும் நிறைவு செய்து, கோடை விடுமுறை அல்லது பூஜை விடுமுறையில் படத்தை வெளியிடப் படக்குழு திட்டமிட்டுள்ளது.
Buy Now ! Pay Daily !
அஜித்துக்கு வில்லனாகும் கன்னட சூப்பர்ஸ்டார்
இப்படத்தில் கன்னடத் திரையுலகின் சூப்பர்ஸ்டார் சிவராஜ்குமார் ஒரு மிக முக்கியமான வில்லன் கதாபாத்திரத்தில் நடிக்க ஒப்பந்தமாகியுள்ளார். இது குறித்த அதிகாரப்பூர்வத் தகவலை அஜித் குமாரின் மேலாளர் சுரேஷ் சந்திரா உறுதிப்படுத்தியுள்ளார்.

இப்படத்தின் வலிமையான எதிர்மறைக் கதாபாத்திரத்திற்காகப் பல முன்னணி நடிகர்களின் பெயர்கள் பரிசீலிக்கப்பட்டன. நடிகர் சிவராஜ்குமார் மீது அஜித் குமார் மிகுந்த மரியாதை வைத்திருப்பதால், அவரை அணுகப் படக்குழு முடிவு செய்தது. நான்கு மாதங்களுக்கு முன்பே இயக்குநர் ஆதிக் ரவிச்சந்திரன் சிவராஜ்குமாரை நேரில் சந்தித்துக் கதையை விவரித்துள்ளார். கதை பிடித்துப்போகவே சிவராஜ்குமார் உடனடியாகச் சம்மதம் தெரிவித்ததாகவும், அதனைத் தொடர்ந்து அஜித் குமாரே தொலைபேசியில் அவரைத் தொடர்புகொண்டு பேசியதாகவும் கூறப்படுகிறது.
மோகன்லாலுக்குப் பதிலாக சிவராஜ்குமார்
ஆரம்பத்தில் இப்படத்தின் தயாரிப்புப் பணிகள் தெலுங்குத் தயாரிப்பு நிறுவனம் ஒன்றுடன் பேச்சுவார்த்தையில் இருந்தபோது, இந்தக் கதாபாத்திரத்தில் மலையாள சூப்பர்ஸ்டார் மோகன்லால் நடிக்கக்கூடும் எனத் தகவல்கள் வெளியாகின. ஆனால், சில தவிர்க்க முடியாத காரணங்களால் அவரால் இப்படத்தில் இணைய முடியாமல் போக, அந்தப் பாத்திரம் தற்போது சிவராஜ்குமார் வசம் சென்றுள்ளது.
தமிழ் சினிமாவில் சிவராஜ்குமாரின் பயணம்
ரஜினிகாந்தின் ‘ஜெயிலர்’ திரைப்படத்தில் ‘நரசிம்மா’ என்ற கதாபாத்திரத்தில் தோன்றித் தமிழ் ரசிகர்களின் மனதில் நீங்கா இடம் பிடித்தவர் சிவராஜ்குமார். அதனைத் தொடர்ந்து ‘கேப்டன் மில்லர்’ மற்றும் ‘ஜெயிலர் 2’ ஆகிய படங்களிலும் நடித்துள்ள இவர், ‘டூரிஸ்ட் ஃபேமிலி’ இயக்குநர் அபிஷன் ஜீவிந்திற்குத் தந்தையாக ‘பிகாசோ’ என்ற படத்திலும் நடித்து வருகிறார். தற்போது அஜித் குமாருக்கு எதிராக முழுநீள வில்லன் கதாபாத்திரத்தில் அவர் களமிறங்குவது, தமிழ் சினிமாவில் அவரது அடுத்தகட்டப் பாய்ச்சலாகப் பார்க்கப்படுகிறது. நடிகர் சிவராஜ்குமார் நவம்பர் 17 அல்லது 18-ஆம் தேதிகளில் ஹைதராபாத் படப்பிடிப்பில் இணைவார் எனத் தெரிவிக்கப்பட்டுள்ளது.அஜித் குமார் - சிவராஜ்குமார் ஆகிய இரு பெரும் ஆளுமைகள் திரையில் நேருக்கு நேர் மோதவுள்ளதால், ‘டேர் டெவில்’ திரைப்படம் தென்னிந்தியத் திரையுலகில் ஒரு முக்கியப் படமாக அமையும் என்பதில் சந்தேகமில்லை.






