தங்கத்தின் விலை ஏன் இவ்வளவு உயர்கிறது? பின்னணி என்ன?

ஒரு காலத்தில் ஒரு குடும்பத்தின் மொத்த சேமிப்பில் கணிசமான பகுதி தங்கம் வாங்குவதற்காக ஒதுக்கப்பட்டது. ஆனால் இன்று ஒரு கிராம் தங்கம் வாங்குவதற்குக் கூட பலமுறை யோசித்து, வரவு செலவுத் திட்டமிட்டு முடிவெடுக்க வேண்டிய நிலை ஏற்பட்டுள்ளது. நீண்ட காலமாகவே பெண்கள் தங்கத்தை வெறும் ஆடம்பரப் பொருளாக மட்டும் கருதாமல், ஒரு பாதுகாப்பான சொத்தாகவும் பார்த்து வருகின்றனர். குறிப்பாக பொருளாதார நெருக்கடியான காலங்களில் தங்கம் அவர்களுக்கு பெரிதும் உதவக்கூடியதாக இருந்துள்ளது.

திருமணம், சேமிப்பு, முதலீடு உள்ளிட்ட பல்வேறு காரணங்களுக்காக இந்திய மக்கள் தங்கத்தை வாங்கி வருகின்றனர். எனவே தங்கத்தின் விலையில் ஏற்படும் மாற்றம் பொதுமக்களுக்கு மட்டுமல்லாமல், வணிகர்களுக்கும் முதலீட்டாளர்களுக்கும் முக்கியத்துவம் வாய்ந்ததாக உள்ளது. 1990-91ஆம் ஆண்டுகளில் சுமார் ரூ.2,530 ஆக இருந்த தங்கத்தின் விலை, படிப்படியாக உயர்ந்து, 2026ஆம் ஆண்டில் 24 காரட் தங்கத்தின் 8 கிராம் விலை சுமார் ரூ.1,18,608 என்ற அளவை எட்டியுள்ளது.

ஆனால் தங்கத்தின் விலை ஏன் தொடர்ந்து உயர்கிறது? சர்வதேச சந்தையில் ஏற்படும் மாற்றங்கள் இந்தியாவில் தங்கத்தின் விலையை எவ்வாறு பாதிக்கின்றன? தங்கம் வாங்குபவர்கள் மட்டுமின்றி, வணிகர்களும் முதலீட்டாளர்களும் ஏன் தங்கத்தின் விலையை தொடர்ந்து கண்காணிக்கின்றனர்? இந்தக் கேள்விகளுக்கான காரணங்களை விரிவாகப் பார்க்கலாம்.

இன்றைய தங்கத்தின் விலை

சென்னையில் 22 காரட் தங்கம் விலை: ஒரு கிராம் – ரூ.13,590
8 கிராம் – ரூ.1,08,720
10 கிராம் – ரூ.1,35,900

24 காரட் தங்கம்:

ஒரு கிராம் – ரூ.14,826
8 கிராம் – ரூ.1,18,608
10 கிராம் – ரூ.1,48,260

18 காரட் தங்கத்தின் விலை:

ஒரு கிராம் – ரூ.11,165
10 கிராம் – ரூ.1,11,650

தங்கத்தின் விலை உயர்வதற்கான முக்கிய காரணங்கள்

சர்வதேச சந்தையில் அதிகரிக்கும் தங்கத்திற்கான தேவை
தங்கத்தின் விலையை நிர்ணயிப்பதில் சர்வதேச சந்தை முக்கிய பங்கு வகிக்கிறது. உலக சந்தையில் தங்கத்திற்கான தேவை அதிகரிக்கும் நிலையில், அதற்கேற்ப வழங்கல் அதிகரிக்கவில்லை என்றால் தங்கத்தின் விலை உயர வாய்ப்புள்ளது.

நகை வாங்குவதற்கான தேவை மட்டுமின்றி, முதலீட்டு நிறுவனங்கள் மற்றும் உலக நாடுகளின் மத்திய வங்கிகள் மேற்கொள்ளும் தங்கக் கொள்முதலும் அதன் விலையைப் பாதிக்கிறது. உலக தங்கக் கழகத்தின் அறிக்கைகளின்படி, புவிசார் அரசியல் நிச்சயமின்மை மற்றும் முதலீட்டுத் தேவை ஆகியவை தங்கச் சந்தையை ஆதரிக்கும் முக்கிய காரணிகளாக உள்ளன.

புவிசார் அரசியல் நிச்சயமின்மை என்றால் என்ன?

ஒரு நாட்டிற்கும் மற்றொரு நாட்டிற்கும் இடையிலான அரசியல் பதற்றம், போர், வர்த்தகத் தடைகள், அரசாங்கங்களின் முக்கிய முடிவுகள் போன்ற காரணங்களால் எதிர்காலத்தில் என்ன நடக்கும் என்பதை உறுதியாகக் கணிக்க முடியாத சூழ்நிலையே புவிசார் அரசியல் நிச்சயமின்மை எனப்படுகிறது.
இத்தகைய சூழ்நிலையில் சில முதலீட்டாளர்கள் தங்கத்தை பாதுகாப்பான சொத்தாகக் கருதி அதில் முதலீடு செய்ய முனைகின்றனர்.

அமெரிக்க டாலர் மற்றும் இந்திய ரூபாயின் மதிப்பு

சர்வதேச சந்தையில் தங்கத்தின் விலை பொதுவாக அமெரிக்க டாலரில் நிர்ணயிக்கப்படுகிறது. இந்தியா தனது தேவைக்கான தங்கத்தின் பெரும்பகுதியை வெளிநாடுகளில் இருந்து இறக்குமதி செய்வதால், அமெரிக்க டாலரின் மதிப்பும் இந்திய ரூபாயின் மாற்று மதிப்பும் இந்தியாவில் தங்கத்தின் விலையை நேரடியாகப் பாதிக்கின்றன.

இதனை ஓர் எளிய உதாரணத்தின் மூலம் புரிந்துகொள்ளலாம். ஒரு அமெரிக்க டாலரின் மதிப்பு ரூ.80 என்றும், சர்வதேச சந்தையில் தங்கத்தின் விலை 100 டாலர் என்றும் வைத்துக்கொள்வோம். 100 டாலர் மதிப்புள்ள தங்கத்தை வாங்க இந்திய மதிப்பில் ரூ.8,000 தேவைப்படும். ஆனால் ஒரு டாலரின் மதிப்பு ரூ.90 ஆக உயர்ந்தால், அதே 100 டாலர் மதிப்புள்ள தங்கத்தை வாங்க ரூ.9,000 தேவைப்படும்.

அதாவது சர்வதேச சந்தையில் தங்கத்தின் விலையில் எந்த மாற்றமும் இல்லாவிட்டாலும், இந்திய ரூபாயின் மதிப்பு டாலருக்கு எதிராகக் குறைந்தால், இந்தியாவில் தங்கத்தை இறக்குமதி செய்வதற்கான செலவு அதிகரிக்கலாம். இதன் விளைவாக உள்நாட்டு சந்தையில் தங்கத்தின் விலையும் உயரக்கூடும்.
இதனுடன் இறக்குமதி வரி, வரிகள், போக்குவரத்துச் செலவு மற்றும் உள்நாட்டு சந்தையில் நிலவும் தேவை ஆகியவையும் இறுதி விலையைப் பாதிக்கின்றன.

போர் மற்றும் புவிசார் அரசியல் பதற்றம் : உலக நாடுகளுக்கு இடையே போர், அரசியல் பதற்றம், வர்த்தக மோதல்கள் போன்றவை அதிகரிக்கும்போது பொருளாதார நிச்சயமின்மையும் அதிகரிக்கிறது. இதுபோன்ற சூழ்நிலையில் பங்குச் சந்தை உள்ளிட்ட சில முதலீடுகளில் அபாயம் அதிகமாக இருக்கலாம் எனக் கருதும் முதலீட்டாளர்கள் தங்கத்தை பாதுகாப்பான சொத்தாகக் கருதி வாங்கலாம்.இதனால் தங்கத்திற்கான தேவை அதிகரித்து, அதன் விலை உயர்வதற்கான வாய்ப்பும் உருவாகலாம். ஆனால் உலகில் ஏற்படும் ஒவ்வொரு மோதலும் தங்கத்தின் விலையை கட்டாயமாக உயர்த்தும் என்று கூற முடியாது. சந்தையின் எதிர்வினை, பொருளாதார நிலை உள்ளிட்ட பல காரணிகளைப் பொறுத்தே இருக்கும்.

வட்டி விகிதம் மற்றும் பணவீக்கம்: வட்டி விகிதமும் பணவீக்கமும் தங்கத்தின் விலையைப் பாதிக்கும் முக்கிய காரணிகளாகும். வங்கிகளில் அதிக வட்டி கிடைக்கும் நிலையில், சில முதலீட்டாளர்கள் தங்கத்தை விட வங்கி வைப்புத் தொகைகள் அல்லது பத்திரங்களில் முதலீடு செய்ய விரும்பலாம். ஆனால் வட்டி விகிதம் குறையும்போது, தங்கம் உள்ளிட்ட பிற முதலீடுகள் முதலீட்டாளர்களுக்கு கவர்ச்சிகரமாக மாறலாம். இதனை ஓர் எளிய உதாரணத்தின் மூலம் பார்க்கலாம். வங்கியில் ரூ.1 லட்சம் முதலீடு செய்தால் ஆண்டுக்கு 7 சதவீத வட்டி கிடைக்கிறது என்று வைத்துக்கொள்வோம்.

அப்போது ஓராண்டில் ரூ.7,000 வட்டி கிடைக்கும். ஆனால் அதே ரூ.1 லட்சத்திற்கு தங்கம் வாங்கினால், தங்கம் நேரடியாக வட்டி வழங்காது. தங்கத்தின் விலை உயர்ந்தால் மட்டுமே அதன் மூலம் லாபம் கிடைக்கும். எனவே வட்டி விகிதம் அதிகமாக இருக்கும் காலங்களில் சில முதலீட்டாளர்கள் தங்கத்தை விட வங்கி வைப்புகளில் முதலீடு செய்யலாம். மாறாக, வங்கி வட்டி 7 சதவீதத்தில் இருந்து 3 சதவீதமாகக் குறைந்தால், ரூ.1 லட்சத்திற்கு ஓராண்டில் ரூ.3,000 மட்டுமே வட்டி கிடைக்கும்.

அப்போது தங்கத்தின் விலை உயர்வின் மூலம் கிடைக்கக்கூடிய லாபம் அதிகமாக இருக்கலாம் எனக் கருதி சில முதலீட்டாளர்கள் தங்கத்தில் முதலீடு செய்யலாம்.இதனால் தங்கத்திற்கான தேவை அதிகரித்து, அதன் விலையும் உயரக்கூடும். ஆனால் தங்கத்தின் விலை நிச்சயமாக உயரும் என்று எந்த உத்தரவாதமும் இல்லை. அதன் விலை குறைவதற்கும் வாய்ப்பு உள்ளது.

மத்திய வங்கிகள் ஏன் தங்கத்தை வாங்குகின்றன? இந்திய ரிசர்வ் வங்கி போன்ற ஒவ்வொரு நாட்டின் மத்திய வங்கியும் அந்த நாட்டின் பணவியல் அமைப்பை நிர்வகிக்கிறது. அப்படியானால் மத்திய வங்கிகள் ஏன் தங்கத்தை வாங்கி தங்களது கையிருப்பில் வைத்திருக்கின்றன? முதலாவதாக, நாட்டின் நிதிப் பாதுகாப்பை வலுப்படுத்துவதற்காக. ஒரு நாட்டின் நாணயத்தின் மதிப்பு காலப்போக்கில் மாறக்கூடும். ஆனால் உலகின் பல நாடுகளாலும் தங்கம் மதிப்புமிக்க சொத்தாகக் கருதப்படுகிறது. எனவே நாட்டின் நிதிக் கையிருப்பில் தங்கம் இருப்பது கூடுதல் பாதுகாப்பை வழங்குகிறது.

இரண்டாவதாக, அமெரிக்க டாலரை மட்டுமே சார்ந்திருப்பதை குறைப்பதற்காக….மத்திய வங்கிகள் தங்களது கையிருப்பை அமெரிக்க டாலர் போன்ற வெளிநாட்டு நாணயங்களுடன் மட்டுப்படுத்தாமல், தங்கத்திலும் முதலீடு செய்து பல்வேறு சொத்துகளாகப் பிரித்து வைத்திருக்கின்றன. இதன் மூலம் ஒரே நாணயத்தின் மீது இருக்கும் சார்பைக் குறைக்க முடியும். மூன்றாவதாக, பொருளாதார நிச்சயமின்மை ஏற்படும் காலங்களில் பாதுகாப்புக்காக. உலகில் போர், அரசியல் பதற்றம் அல்லது நிதி நெருக்கடி ஏற்படும் போது தங்கத்தை ஒப்பீட்டளவில் பாதுகாப்பான சொத்தாக சில முதலீட்டாளர்களும் மத்திய வங்கிகளும் கருதுகின்றனர்.

நான்காவதாக, நீண்டகால நிதிக் கையிருப்பாக பராமரிப்பதற்காக…..தங்கம் ஒரு பௌதிகச் சொத்து என்பதால், குறிப்பிட்ட ஒரு நாட்டின் நாணயத்தின் வாக்குறுதியை மட்டும் நேரடியாகச் சார்ந்திருக்காது.
மத்திய வங்கிகள் பெரிய அளவில் தங்கத்தை வாங்கும்போது, சர்வதேச சந்தையில் தங்கத்திற்கான தேவை அதிகரிக்கலாம். அதே அளவுக்கு வழங்கல் உடனடியாக அதிகரிக்கவில்லை என்றால், தங்கத்தின் விலை உயர்வதற்கான அழுத்தம் ஏற்படலாம்.

இந்தியாவின் இறக்குமதி வரி மற்றும் வரிகள்

இந்தியாவில் தங்கத்தின் விலை சர்வதேச சந்தை விலையை மட்டும் அடிப்படையாகக் கொண்டு நிர்ணயிக்கப்படுவதில்லை.தங்கத்தை இறக்குமதி செய்வதற்கான செலவு, சுங்க வரி, பொருந்தக்கூடிய வரிகள் மற்றும் உள்நாட்டு சந்தையின் நிலவரம் உள்ளிட்ட பல காரணிகளும் இறுதி விலையில் தாக்கத்தை ஏற்படுத்துகின்றன.இறக்குமதி செலவு அதிகரித்தால், அதன் தாக்கம் உள்நாட்டு தங்கத்தின் விலையிலும் பிரதிபலிக்கலாம்.

அதே நேரத்தில் தங்கத்தின் விலை அதிகரிப்பதால், பொதுமக்கள் நகைகள் வாங்கும் அளவும் குறைய வாய்ப்புள்ளது.இதனால்தான் சர்வதேச சந்தையில் ஏற்படும் ஒரு சிறிய விலை மாற்றம் கூட இந்தியாவில் நுகர்வோர் செலுத்தும் தங்கத்தின் விலையில் வேறுபட்ட அளவில் பிரதிபலிக்கலாம்.

தங்கத்தின் விலை எப்போதும் உயருமா? இல்லை.தங்கத்தின் விலை எப்போதும் தொடர்ந்து உயர்ந்து கொண்டே இருக்காது.சில காலங்களில் அதன் விலை உயரலாம். சில காலங்களில் குறையவும் செய்யலாம். இது சர்வதேச சந்தையின் நிலவரம், பொருளாதார சூழல், முதலீட்டாளர்களின் மனநிலை உள்ளிட்ட பல காரணிகளைப் பொறுத்தது.

தங்கத்தின் விலை உயர்வதற்கான முக்கிய காரணங்கள்: உலகில் போர் மற்றும் அரசியல் பதற்றம் அதிகரிப்பது.மத்திய வங்கிகள் அதிக அளவில் தங்கம் வாங்குவது. அமெரிக்க டாலரின் மதிப்பு குறைவது.பணவீக்கம் குறித்த அச்சம் அதிகரிப்பது.

தங்கத்தின் விலை குறைவதற்கான முக்கிய காரணங்கள்: அமெரிக்க டாலரின் மதிப்பு அதிகரிப்பது.வட்டி விகிதம் அதிகரிப்பதால் தங்கத்தை விட பிற முதலீடுகள் கவர்ச்சிகரமாக மாறுவது.முதலீட்டாளர்கள் தங்களிடம் உள்ள தங்கத்தை விற்பது. தங்கத்திற்கான தேவை குறைவது.

ஒரு எளிய உதாரணம்,இன்று 10 கிராம் தங்கத்தின் விலை ரூ.80,000 என்று வைத்துக்கொள்வோம்.
அடுத்த நாள் தங்கத்திற்கான தேவை அதிகரித்தால், அதன் விலை ரூ.82,000 ஆக உயரலாம்.ஆனால் அடுத்த வாரம் சர்வதேச சந்தை நிலவரம் மாறினால், அதே 10 கிராம் தங்கத்தின் விலை ரூ.78,000 ஆகவும் குறையலாம்.
எனவே தங்கத்தின் விலை எப்போதும் ஒரே திசையில் மட்டுமே நகரும் என்று கூற முடியாது.

நீண்ட காலத்தில் தங்கத்தின் விலை பல்வேறு காலகட்டங்களில் உயர்ந்துள்ளது.ஆனால் ஒவ்வொரு ஆண்டும் தங்கத்தின் விலை கட்டாயமாக உயரும் என்று உத்தரவாதம் அளிக்க முடியாது.சில காலகட்டங்களில் பல மாதங்கள் அல்லது பல ஆண்டுகள்கூட தங்கத்தின் விலை குறைய வாய்ப்புள்ளது.

எனவே தங்கத்தை வாங்கும்போது, அதன் விலை நிச்சயமாக உயரும் என்ற எதிர்பார்ப்பில் மட்டுமே முடிவெடுக்கக் கூடாது.குறுகிய காலத்தில் தங்கத்தின் விலை எவ்வாறு நகரும் என்பதை யாராலும் உறுதியாகக் கணிக்க முடியாது.

தங்கத்தில் முதலீடு செய்வதற்கு முன், சர்வதேச சந்தை நிலவரம், வட்டி விகிதம், பணவீக்கம், நாணய மாற்று விகிதம் மற்றும் உங்கள் சொந்த நிதிநிலை ஆகியவற்றை கருத்தில் கொள்வது அவசியம். ஒரு கிராம் தங்கத்தின் விலை எவ்வளவு என்பதை மட்டும் தெரிந்துகொள்வது போதாது. அந்த விலை ஏன் உயர்கிறது, ஏன் குறைகிறது என்பதையும் புரிந்துகொள்வதே முக்கியம்.