இந்தியாவில் அரிசி விலை மேலும் உயரக்கூடும் என்ற அச்சம் அதிகரித்துள்ளது. ஏற்கனவே நாட்டின் சில பகுதிகளில் வறட்சி காரணமாக நெல் சாகுபடி பாதிக்கப்பட்டுள்ள நிலையில், அரிசி விலையிலும் உயர்வு காணப்படுகிறது.
இதற்கு முக்கிய காரணிகளில் ஒன்றாக எல் நினோ பார்க்கப்படுகிறது. பசிபிக் பெருங்கடலின் மத்திய மற்றும் கிழக்குப் பகுதிகளில் கடல் வெப்பநிலை அதிகரிக்கும் இந்த இயற்கையான வானிலை நிகழ்வு, இந்தியாவின் பருவமழை முறையை பாதிக்கக்கூடும். பொதுவாக எல் நினோ காலங்களில் இந்தியாவில் மழைப்பொழிவு குறையும் வாய்ப்பு உள்ளது.
2026ஆம் ஆண்டு எல் நினோ அக்டோபர் முதல் டிசம்பர் வரை மேலும் வலுப்பெற வாய்ப்புள்ளதாக தெரிவிக்கப்பட்டுள்ளது. இதனால் மழைப்பொழிவு குறைந்து, விவசாயம் மற்றும் நீர்வளத்தில் பாதிப்பு ஏற்படும் அச்சம் உள்ளது.
மழை குறைந்தால் நெல் சாகுபடி பாதிக்கப்பட்டு உற்பத்தி குறையலாம். இதன் தாக்கம் சந்தையில் அரிசி விலையிலும் எதிரொலிக்க வாய்ப்புள்ளது. இந்தியாவின் அரிசி உற்பத்தி குறையக்கூடும் என்ற எதிர்பார்ப்பும் நிலவி வருகிறது.
இதனால் சில பகுதிகளில் மக்கள் அரிசியை முன்கூட்டியே வாங்கி சேமிக்கத் தொடங்கியுள்ளதாக கூறப்படுகிறது. ஆனால் உடனடியாக அரிசி தட்டுப்பாடு ஏற்படும் என்று கூற முடியாது. அரசிடம் கணிசமான அரிசி கையிருப்பு இருப்பதால், விலை மற்றும் விநியோக நிலைமையை அரசு தொடர்ந்து கண்காணித்து வருகிறது.
தற்போது பொதுமக்கள் தேவைக்கு அதிகமாக அரிசியை பதுக்கி வைப்பதை தவிர்த்து, வழக்கமான அளவில் வாங்குவது சிறந்தது. எல் நினோவின் தாக்கம், மழைப்பொழிவு, நெல் உற்பத்தி மற்றும் சந்தை நிலவரம் ஆகியவற்றைப் பொறுத்தே எதிர்கால அரிசி விலை நிலவரம் அமையும்.
