‘குட் பேட் அக்லி’ படத்துடன் ஓப்பிட்டு வரும் கருத்துகள் தொடர்பாக ‘ஓஜி’ இயக்குநர் சுஜீத் விளக்கமளித்துள்ளார்.
சுஜித் இயக்கத்தில் பவன் கல்யாண் நடிப்பில் வெளியாகியுள்ள படம் ‘ஓஜி’. இப்படத்துக்கு பெரும் வரவேற்பு கிடைத்து, தெலுங்கில் வசூல் சாதனை படைத்து வருகிறது. இப்படம் வெளியான சமயத்தில் இருந்தே ‘குட் பேட் அக்லி’ படத்துடன் ஒப்பிட்டு பலரும் கருத்து தெரிவித்து வந்தார்கள். ஏனென்றால் ‘குட் பேட் அக்லி’ படத்தில் ‘ஓஜி சம்பவம்’ என்ற பாடல் இடம்பெற்று இருந்தது.
தற்போது ‘குட் பேட் அக்லி’ படத்துடன் ‘ஓஜி’ ஓப்பீடு குறித்து பேட்டியொன்றில் பேசியிருக்கிறார் இயக்குநர் சுஜீத். அதில், “ஆதிக் ரவிச்சந்திரன் ‘குட் பேட் அக்லி’ படத்தின் கதையை எழுதத் தொடங்குவதற்கு முன்பே, ‘ஓஜி’ படத்தின் கிளிம்ப்ஸ் வீடியோவை வெளியிட்டுவிட்டோம். எனக்கு அவரை நன்றாக தெரியும். அவருக்கு என்னையும், என் படங்களையும் ரொம்ப பிடிக்கும். ‘த்ரிஷா இல்லனா நயன்தாரா’ காலத்தில் இருந்தே அவரை எனக்கு தெரியும்.
‘குட் பேட் அக்லி’ படக்குழுவினர் ‘ஓஜி சம்பவம்’ என்ற தலைப்பில் பாடலொன்றை வெளியிட்டார்கள். பொதுவாக எந்தவொரு பாடல் முதலில் வெளியானாலும் அதுவே அசலாகக் கருதப்படும். அப்படக்குழுவினர் வேண்டுமென்றே அதனை செய்யவில்லை. ஆனால், என் படம் விமர்சிக்கப்பட்டது. ‘ஓஜி’ வெளியீடு தாமதமானதால் ஓப்பீடுகள் தவிர்க்க முடியாதவை. ‘குட் பேட் அக்லி’ படத்தில் அர்ஜுன் தாஸ் வில்லனாக நடித்திருந்தார். அஜித் சார் படத்துக்காக அவர் ஒப்பந்தமான நேரத்தில் தான் ‘ஓஜி’ படத்தில் அவருடைய பகுதிகளை படமாக்கத் தொடங்கியிருந்தோம்” என்று தெரிவித்துள்ளார் சுஜீத்.
