சென்னை: தமிழகத்தில் கடந்த நான்கரை ஆண்டுகளில் 4,510 விளையாட்டு வீரர்களுக்கு ரூ.150 கோடி உயரிய ஊக்கத்தொகை வழங்கப்பட்டுள்ளதாக துணை முதல்வர் உதயநிதி ஸ்டாலின் தெரிவித்தார். தமிழக இளைஞர் நலன், விளையாட்டு மேம்பாட்டுத் துறை சார்பில் சர்வதேச, ஆசிய, தேசிய அளவிலான விளையாட்டுப் போட்டிகளில் பதக்கங்கள் வென்ற வீரர்களுக்கு உயரிய ஊக்கத்தொகை வழங்கும் நிகழ்ச்சி சென்னை கலைவாணர் அரங்கில் நேற்று நடைபெற்றது.
துணை முதல்வர் உதயநிதி ஸ்டாலின் தலைமை வகித்து, 819 விளையாட்டு வீரர், வீராங்கனைகளுக்கு ரூ.21.40 கோடி உயரிய ஊக்கத்தொகைக்கான காசோலைகளை வழங்கினார். பணியின்போது காலமான தமிழ்நாடு விளையாட்டு மேம்பாட்டு ஆணைய பணியாளர்களின் வாரிசுகளான எஸ்.தீபா, ஆர்.தினேஷ், எம்.தினேஷ்குமார், பி.ஹரிஷ் ஆகிய 4 பேருக்கு கருணை அடிப்படையில் பணி நியமன ஆணைகளையும் வழங்கினார்.
பின்னர், அவர் பேசியதாவது: கல்வி என்றால் பள்ளிக்கல்வி, உயர்கல்வி மட்டுமின்றி, உடற்கல்வியும் முக்கியம். இதனாலேயே, சென்னையில் நடந்த ‘கல்வியில் சிறந்த தமிழ்நாடு’ நிகழ்ச்சியில் விளையாட்டு வீரர், வீராங்கனைகளையும் அழைத்து முதல்வர் ஊக்குவித்தார். விளையாட்டு வீரர்களை கொண்டாடுவதில் நாட்டிலேயே முதன்மை மாநிலமாக தமிழகம் உள்ளது. அந்த அளவுக்கு அவர்களுக்கு தேவையான வசதிகளை அரசு செய்து வருகிறது.
கடந்த நான்கரை ஆண்டுகளில் நாட்டில் வேறு எங்கும் இல்லாத அளவில் 4,510 விளையாட்டு வீரர்களுக்கு ரூ.150 கோடி உயரிய ஊக்கத்தொகையை தமிழக அரசு வழங்கியுள்ளது. பொதுவாக, போட்டிகளில் பங்கேற்று வெற்றி பெற்ற பிறகுதான் வீரர்களுக்கு அரசு அங்கீகாரம், பரிசுத் தொகை கிடைக்கும். ஆனால், போட்டியில் கலந்து கொள்வதற்கு முன்பே வீரர்களுக்கு ஊக்கத்தொகை, நிதியுதவியை தமிழக அரசு மட்டும்தான் வழங்குகிறது.
விளையாட்டில் வெற்றி பெற்றால் அரசு வேலையும் வழங்கப்படுகிறது. அந்த வகையில், தமிழக வரலாற்றில் முதல்முறையாக கடந்த ஆண்டு 100-க்கும் அதிகமான வீரர்களுக்கு அரசு வேலைவாய்ப்பு வழங்கப்பட்டுள்ளது. இவ்வாறு அவர் பேசினார். இந்த நிகழ்ச்சியில் விளையாட்டுத் துறை செயலர் அதுல்ய மிஸ்ரா, தமிழ்நாடு விளையாட்டு மேம்பாட்டு ஆணைய துணைத் தலைவர் அசோக் சிகாமணி, உறுப்பினர் செயலர் மேகநாத ரெட்டி, ஸ்பீட் ஸ்கேட்டிங் உலக சாம்பியன் ஆனந்த்குமார் வேல்குமார், செஸ் கிராண்ட் மாஸ்டர் ர.வைஷாலி உள்ளிட்டோர் பங்கேற்றனர்.
