லக்னோ: ஆஸ்திரேலியா ‘ஏ’ – இந்தியா ‘ஏ’ அணிகள் இடையிலான அதிகாரப்பூர்வமற்ற முதல் டெஸ்ட் கிரிக்கெட் லக்னோவில் நடைபெற்று வந்தது. இதன் முதல் இன்னிங்ஸில் ஆஸ்திரேலியா ‘ஏ’ அணி 98 ஓவர்களில் 6 விக்கெட்கள் இழப்புக்கு 532 ரன்கள் குவித்து டிக்ளேர் செய்தது.
இதையடுத்து விளையாடிய இந்தியா ‘ஏ’ அணி 3-வது நாள் ஆட்டத்தின் முடிவில் 103 ஓவர்களில் 4 விக்கெட்கள் இழப்புக்கு 403 ரன்கள் குவித்தது. துருவ் ஜூரெல் 113 ரன்களும், தேவ்தத் படிக்கல் 86 ரன்களுடன் களத்தில் இருந்தனர். நேற்றைய கடைசி நாள் ஆட்டத்தை விளையாடிய இந்தியா ‘ஏ’ அணி 141.1 ஓவர்களில் 7 விக்கெட்கள் இழப்புக்கு 531 ரன்கள் குவித்த நிலையில் டிக்ளேர் செய்தது.
தனது 7-வது முதல்தர போட்டி சதத்தை விளாசிய தேவ்தத் படிக்கல் 281 பந்துகளில், ஒரு சிக்ஸர், 14 பவுண்டரிகளுடன் 150 ரன்கள் விளாசிய நிலையில் ஆட்டமிழந்தார். துருவ் ஜூரெல் 197 பந்துகளில், 5 சிக்ஸர்கள், 13 பவுண்டரிகளுடன 140 ரன்கள் சேர்த்து வெளியேறினார். இதையடுத்து 2-வது இன்னிங்ஸை விளையாடிய ஆஸ்திரேலிய அணி 16 ஓவர்களில் விக்கெட் இழப்பின்றி 56 ரன்கள் எடுத்த நிலையில் ஆட்டம் டிராவில் முடிவடைந்ததாக அறிவிக்கப்பட்டது. சாம் கான்ஸ்டாஸ் 27, கேம்ப்பெல் கெல்லாவே 24 ரன்கள் எடுத்தனர்.
