சென்னை: எம்சிசி முருகப்பா கோப்பை ஹாக்கி போட்டியின் லீக் ஆட்டத்தில் இந்திய கடற்படை அணி, மத்திய நேரடி வரிகள் வாரிய அணியை வென்றது.
இந்தப் போட்டி சென்னை எழும்பூர் மேயர் ராதாகிருஷ்ணன் மைதானத்தில் நடைபெற்று வருகிறது. நேற்று நடைபெற்ற லீக் ஆட்டத்தில் இந்திய கடற்படை அணி (ஐஎன்என்) 4-1 என்ற கோல் கணக்கில் மத்திய நேரடி வரிகள் வாரிய (சிபிடிடி) அணியை வீழ்த்தியது.
கடற்படை அணி சார்பில் அஜிங்கியா ஜாதவ் 2 கோல்களும் (17, 35-வது நிமிடங்கள்), கே.செல்வராஜ் 2 கோல்களும் (33, 36-வது நிமிடங்கள்) அடித்தனர். மத்திய நேரடி வரிகள் வாரிய அணி சார்பில் மெஹ்கீத் சிங் ஒரு கோல் (23-வது நிமிடம்) அடித்தார். மற்றொரு லீக் ஆட்டத்தில் இந்திய ராணுவ அணி (ஐஎன்ஏ) 2-1 என்ற கோல் கணக்கில் ஹாக்கி மகாராஷ்டிரா அணியை தோற்கடித்தது.
இந்திய ராணுவ அணி சார்பில் பிரதீப் சிங் பிஷ்த் (29-வது நிமிடம்), நீரஜ் குமார் சிங் (53-வது நிமிடம்) ஆகியோர் தலா ஒரு கோலடித்தனர். மகாராஷ்டிர அணி சார்பில் கணேஷ் பாட்டீல் ஒரு கோலடித்தார் (21-வது நிமிடம்).
