ஆசியக் கோப்பை டி20 கிரிக்கெட் தொடரில் பாகிஸ்தானை வீழ்த்தி இந்தியா வெற்றி வாகை சூடியது. இதன் மூலம் 9வது முறையாக ஆசிய கோப்பை இந்தியா கைப்பற்றியுள்ளது.
துபாய் சர்வதேச மைதானத்தில் நடைபெற்ற இந்தப் போட்டியில் டாஸ் வென்ற இந்திய அணி முதலில் பந்து வீச முடிவு செய்தது. பாகிஸ்தான் அணிக்காக சாஹிப்ஸாதா ஃபர்ஹான் மற்றும் பஹர் ஸமான் இணைந்து இன்னிங்ஸை ஓப்பன் செய்தனர்.
இருவரும் இணைந்து முதல் விக்கெட்டுக்கு 84 ரன்கள் பார்ட்னர்ஷிப் அமைத்தனர். இந்த இன்னிங்ஸில் 35 பந்துகளில் அரைசதம் விளாசினார் ஃபர்ஹான். வருண் சக்கரவர்த்தி வீசிய முதல் இன்னிங்ஸின் 10-வது ஓவரில் ஃபர்ஹான் ஆட்டமிழந்தார். அவர் 38 பந்துகளில் 57 ரன்கள் எடுத்து வெளியேறினார். 5 பவுண்டரி மற்றும் 3 சிக்ஸர்களை அவர் விளாசினார்.
அதன் பிறகு பாகிஸ்தான் அணி தொடர்ச்சியாக விக்கெட்டுகளை இழந்தது. சயிம் அயூப் 14, முகமது ஹாரிஸ் 0, ஸமான் 46, ஹுசைன் தலாத் 1, கேப்டன் சல்மான் அலி ஆகா 8, ஷாஹீன் ஷா அப்ரிடி 0, பஹீம் அஷ்ரப் 0, ஹாரிஸ் ரவூஃப் 6, முகமது நவாஸ் 6 ரன் எடுத்து ஆட்டமிழந்தனர்.
19.1 ஓவர்களில் 146 ரன்கள் எடுத்த நிலையில் பாகிஸ்தான் அணி அனைத்து விக்கெட்டுகளையும் இழந்தது. இந்திய அணி தரப்பில் குல்தீப் யாதவ் 4, வருண் சக்ரவர்த்தி 2, அக்சர் 2, பும்ரா 2 விக்கெட் கைப்பற்றினர்.
இந்த ஆட்டத்தில் இந்திய அணி வெற்றி பெற 147 ரன்கள் தேவை என்ற இலக்கு நிர்ணயிக்கப்பட்டது. முதலில் களமிறங்கிற அபிஷேக் சர்மா 5 ரன்களில் ஆட்டமிழந்து ஏமாற்றம் தந்தார். இலங்கை உடனான அரை இறுதியில் அவர் 61 ரன்கள் விளாசியது நினைவுகூரத்தக்கது.
மறுமுனையில் ஆடிய ஷுப்மன் கில் 12 ரன்களுடன் வெளியேறினார். கேப்டன் சூர்யகுமார் ஒரே ரன்னில் ஆட்டமிழந்து நடையை கட்டினார். 69 ரன்கள் எடுத்து ஆட்டத்தின் ஸ்கோரை ஏற்றினார் திலக் வர்மா. சஞ்சு சாம்சன் 24 ரன்களில் ஃபர்ஹானிடம் கேட்ச் கொடுத்து அவுட் ஆனார். அடுத்து இறங்கிய ஷிவம் டூபே 33 ரன்கள் எடுத்தார். ரிங்கு சிங் 4 ரன்களுடன் களத்தில் இருந்தார். கடைசி ஓவரில் திலக் வர்மா எடுத்த சிக்ஸர் இந்திய அணியை வெற்றியை நோக்கி மேலும் நகர்த்தியது. இப்படியாக 19.5 ஓவர்களில் 150 ரன்கள் எடுத்து இந்திய அணி வெற்றி பெற்றது. இதனால் தொடர்ந்து இரண்டாவது முறையாக ஆசிய கோப்பையை கைப்பற்றியது இந்திய அணி.
ஆசிய கோப்பை கிரிக்கெட் தொடரில் இந்திய அணி 9 முறை சாம்பியன் பட்டம் (1984, 1988, 1990, 1995, 2010, 2016, 2018, 2023, 2025) வென்றுள்ளது குறிப்பிடத்தக்கது
