நியூயார்க்: யுஎஸ் ஓபன் டென்னிஸ் தொடரின் ஆடவர் ஒற்றையர் பிரிவில் ஸ்பெயினின் கார்லோஸ் அல்கராஸ் சாம்பியன் பட்டம் வென்றார்.
அமெரிக்காவின் நியூயார்க் நகரில் நேற்று முன்தினம் இரவு நடைபெற்ற ஆடவர் ஒற்றையர் பிரிவு இறுதிப் போட்டியில் முதல் நிலை வீரரும் நடப்பு சாம்பியனுமான இத்தாலியின் ஜன்னிக் சின்னர், 2-ம் நிலை வீரரான ஸ்பெயினின் கார்லோஸ் அல்கராஸுடன் மோதினார்.
இந்த ஆண்டில் மட்டும் இவர்கள் நேருக்கு நேர் மோதும் 3-வது கிராண்ட் ஸ்லாம் இறுதிப் போட்டியாக இந்த ஆட்டம் அமைந்ததால் ரசிகர்கள் மத்தியில் மிகுந்த எதிர்பார்ப்பு இருந்தது. 2 மணி நேரம் 42 நிமிடங்கள் நடைபெற்ற இந்த ஆட்டத்தில் கார்லோஸ் அல்கராஸ் 6-2, 3-6, 6-1, 6-4 என்ற செட் கணக்கில் வெற்றி பெற்று சாம்பியன் பட்டம் வென்றார்.
சாம்பியன் பட்டம் வென்ற அல்கராஸ் ரூ.41.4 கோடி பரிசுத் தொகையை பெற்றார். 2-வது இடம் பிடித்த ஜன்னிக் சின்னருக்கு ரூ.20.75 கோடி பரிசாக வழங்கப்பட்டது. யுஎஸ் ஓபனில் அல்கராஸ் பட்டம் வெல்வது இது 2-வது முறையாகும். கடந்த 2022-ம் ஆண்டு தொடரிலும் அவர், கோப்பையை வென்றிருந்தார். ஒட்டுமொத்தமாக அல்கராஸ் வென்றுள்ள 6-வது கிராண்ட் ஸ்லாம் பட்டம் இதுவாகும்.
