நியூயார்க்: யுஎஸ் ஓபன் டென்னிஸ் தொடரில் நடப்பு சாம்பியனான இத்தாலியின் ஜன்னிக் சின்னர் அரை இறுதி சுற்றுக்கு முன்னேறினார். அதேவேளையில் மகளிர் பிரிவில் 2-ம் நிலை வீராங்கனையான போலந்தின் இகா ஸ்வியாடெக் கால் இறுதி சுற்றில் அதிர்ச்சி தோல்வி அடைந்தார்.
அமெரிக்காவின் நியூயார்க் நகரில் நடைபெற்று வரும் இந்தத் தொடரில் ஆடவர் ஒற்றையர் பிரிவு கால் இறுதி சுற்றில் முதல் நிலை வீரரும், நடப்பு சாம்பியனுமான இத்தாலியின் ஜன்னிக் சின்னர், 10-ம் நிலை வீரரான சகநாட்டைச் சேர்ந்த லோரென்சோ முசெட்டியுடன் மோதினார். இதில் ஜன்னிக் சின்னர் 6-1, 6-4, 6-2 என்ற நேர் செட் கணக்கில் எளிதாக வெற்றி பெற்று அரை இறுதிக்கு முன்னேறினார்.
கிராண்ட் ஸ்லாம் தொடர்களில் ஜன்னிக் சின்னர் அரை இறுதிக்கு தொடர்ச்சியாக முன்னேறுவது இது 5-வது முறையாகும். இந்த ஆண்டில் நடைபெற்ற அனைத்து கிராண்ட் ஸ்லாம் தொடர்களில் அவர், அரை இறுதியில் கால்பதித்துள்ளார். இந்த வகையில் அவர், கிராண்ட் ஸ்லாம் தொடர்களில் 26 வெற்றிகளை தொடர்ச்சியாக குவித்துள்ளார்.
அரை இறுதியில் ஜன்னிக் சின்னர், 25-ம் நிலை வீரரான கனடாவின் பெலிக்ஸ் ஆகர்-அலியாசிமுடன் மோதுகிறார். பெலிக்ஸ் ஆகர்-அலியாசிம் கால் இறுதி சுற்றில் 8-ம் நிலை வீரரான ஆஸ்திரேலியாவின் அலெக்ஸ் டி மினாரை 4-6, 7-6 (9-7), 7-5, 7-6 (7-4) என்ற செட் கணக்கில் போராடி வீழ்த்தினார். இந்த ஆட்டம் 4 மணி நேரம் 10 நிமிடங்கள் நடைபெற்றது. கிராண்ட் ஸ்லாம் தொடர்களில் பெலிக்ஸ் ஆகர்-அலியாசிம் அரை இறுதிக்கு முன்னேறுவது இதுவே 2-வது முறையாகும். இதற்கு முன்னர் கடந்த 2021-ம் ஆண்டு நடைபெற்ற யுஎஸ் ஓபன் தொடரில் அரை இறுதிக்கு முன்னேறியிருந்தார்.
பெலிக்ஸ் ஆகர்-அலியாசிம், கிராண்ட் ஸ்லாம் தொடர்களில் போட்டித் தரவரிசையில் உள்ள 3 வீரர்களை வீழ்த்துவது இதுவே முதன்முறையாகும். நடப்பு தொடரில் அவர், 3-வது சுற்றில் 3-ம் நிலை வீரரான ஜெர்மனியின் அலெக்ஸாண்டர் ஜிவேரேவையும், 4-வது சுற்றில் 15-ம் நிலை வீரரான ரஷ்யாவின் ஆந்த்ரே ரூப்லெவையும் வீழ்த்தியிருந்தார்.
மகளிர் ஒற்றையர் பிரிவு கால் இறுதி சுற்றில் கிராண்ட் ஸ்லாம் தொடர்களில் 4 முறை சாம்பியன் பட்டம் வென்ற 23-ம் நிலை வீராங்கனையான ஜப்பானின் நவோமி ஒசாகா, 11-ம் நிலை வீராங்கனையான செக்குடியரசின் கரோலினா முச்சோவாவை எதிர்த்து விளையாடினார். இதில் நவோமி ஒசாகா 6-4, 7-6 (7-3) என்ற செட் கணக்கில் வெற்றி பெற்று அரை இறுதி சுற்றுக்கு முன்னேறினார்.
மற்றொரு கால் இறுதி ஆட்டத்தில் 2-ம் நிலை வீராங்கனையான போலந்தின் இகா ஸ்வியாடெக், 8-ம் நிலை வீராங்கனையான அமெரிக்காவின் அமண்டா அனிசிமோவாவுடன் மோதினார். இதில் அமண்டா அனிசிமோவா 6-4, 6-3 என்ற நேர் செட் கணக்கில் வெற்றி பெற்று அரை இறுதி சுற்றில் கால்பதித்தார். கடந்த இரு மாதங்களுக்கு முன்னர் நடைபெற்ற விம்பிள்டன் இறுதிப் போட்டியில் இகா ஸ்வியா டெக், அனிசிமோவாவை தோற்கடித்து இருந்தார். இதற்கு தற்போது அனிசிமோவா பதிலடி கொடுக்கும் விதமாக கால் இறுதி ஆட்டம் அமைந்திருந்தது.
அரை இறுதியில் யுகி பாம்ப்ரி ஜோடி: ஆடவர் இரட்டையர் பிரிவு கால் இறுதி சுற்றில் இந்தியாவின் யுகி பாம்ப்ரி, நியூஸிலாந்தின் மைக்கேல் வீனஸ் ஜோடியானது குரோஷியாவின் நிகோலா மெக்டிக், அமெரிக்காவின் ராஜீப் ராம் ஜோடியுடன் மோதியது. இதில் யுகி பாம்ப்ரி ஜோடி 6-3, 6-7(8), 6-3 என்ற செட் கணக்கில் வெற்றி பெற்று அரை இறுதிக்கு முன்னேறியது. கிராண்ட் ஸ்லாம் தொடர்களில் யுகி பாம்ப்ரி அரை இறுதிக்கு முன்னேறுவது இதுவே முதன்முறையாகும்.
