நியூயார்க்: யுஎஸ் ஓபன் டென்னிஸ் தொடரில் ஆடவர் ஒற்றையர் பிரிவு இறுதிப் போட்டியில் முதல் நிலை வீரரான ஜன்னிக் சின்னருடன் பலப்பரீட்சை நடத்துகிறார் 2-ம் நிலை வீரரான கார்லோஸ் அல்கராஸ்.
அமெரிக்காவின் நியூயார்க் நகரில் நடைபெற்று வரும் இந்தத் தொடரில் ஆடவர் ஒற்றையர் பிரிவு அரை இறுதி ஆட்டத்தில் 2-ம் நிலை வீரரான ஸ்பெயினின் கார்லோஸ் அல்கராஸ், 7-ம் நிலை வீரரரும் 4 முறை சாம்பியனுமான செர்பியாவின் நோவக் ஜோகோவிச்சுடன் மோதினார்.
2 மணி நேரம் 23 நிமிடங்கள் நடைபெற்ற இந்த ஆட்டத்தில் கார்லோஸ் அல்கராஸ் 6-4, 7-6 (7-4), 6-2 என்ற செட் கணக்கில் வெற்றி பெற்று இறுதிப் போட்டிக்கு முன்னேறினார். மற்றொரு அரை இறுதியில் முதல் நிலை வீரரான இத்தாலியின் ஜன்னிக் சின்னர், 25-ம் நிலை வீரரான கனடாவின் ஃபெலிக்ஸ் ஆகர்-அலியாசிமுடன் மோதினார்.
3 மணி நேரம் 21 நிமிடங்கள் நடைபெற்ற இந்த ஆட்டத்தில் ஜன்னிக் சின்னர் 6-1, 3-6, 6-3, 6-4 என்ற செட் கணக்கில் வெற்றி பெற்று இறுதிப் போட்டிக்கு முன்னேறினார். சாம்பியன் பட்டம் வெல்வதற்கான இறுதிப் போட்டியில் ஜன்னிக் சின்னர், கார்லோஸ் அல்கராஸுடன் மோதுகிறார். இன்று இரவு நடைபெறும் இந்த ஆட்டத்தை அமெரிக்க அதிபர் டெனால்டு ட்ரம்ப் நேரில் கண்டுகளிக்க உள்ளார்.
