நியூயார்க்: யுஎஸ் ஓபன் கிராண்ட்ஸ்லாம் டென்னிஸ் போட்டியின் 4-வது சுற்றுக்கு போலந்து வீராங்கனை இகா ஸ்வியாடெக், இத்தாலி வீரர் ஜன்னிக் சின்னர் ஆகியோர் முன்னேறியுள்ளனர்.
யுஎஸ் ஓபன் கிராண்ட்ஸ்லாம் டென்னிஸ் போட்டி அமெரிக்காவின் நியூயார்க் நகரில் நடைபெற்று வருகிறது. நேற்று முன்தினம் நடைபெற்ற ஆடவர் ஒற்றையர் பிரிவு 3-வது சுற்றுபோட்டியில் முதல் நிலை வீரரான ஜன்னிக் சின்னர், தரவரிசையில் 27-ம் நிலையில் இருக்கும் கனடா வீரர் டெனிஸ் ஷபோவலோவுடன் மோதினார். இந்த ஆட்டத்தில் ஜன்னிக் சின்னர் 5-7, 6-4, 6-3, 6-3 என்ற கணக்கில் வெற்றி பெற்று 4-வது சுற்றுக்கு முன்னேறினார்.
முதல் செட்டை டெனிஸ் ஷபோவலோவ் 7-5 என்ற கணக்கில் கைப்பற்றினார். ஆனால், அடுத்த 3 செட்களிலும் சுதாரித்து விளையாடி வெற்றியை வசப்படுத்தினார் சின்னர். 4-ம் நிலை வீரரான கஜகஸ்தானின் அலெக்சாண்டர் பப்ளிக் 7-6 (7/5), 6-7 (4/7), 6-3, 6-7 (5/7), 6-1 என்ற செட் கணக்கில் அமெரிக்காவின் டாமி பாலை தோற்கடித்தார்.
3-வது சுற்று ஆட்டம் ஒன்றில் 10-ம் நிலை வீரரான இத்தாலியின் லாரன்ஸோ முசெட்டியும், 24-ம் நிலை வீரரான இத்தாலியின் பிளேவியோ கோபோலியும் மோதினர். இதில் 6-3, 6-2, 2-0 என்ற கணக்கில் முசெட்டி முன்னிலையில் இருந்தபோது, ஆட்டத்திலிருந்து பிளேவியோ கோபோலி விலகினார். இதையடுத்து முசெட்டி வெற்றி பெற்றதாக அறிவிக்கப்பட்டார்.
25-ம் நிலை வீரரான கனடாவின் பெலிக்ஸ் ஆகர் அலியாசிம் 4-6, 7-6 (9/7), 6-4, 6-4 என்ற செட் கணக்கில் 3-ம் நிலை வீரரான அலெக்சாண்டர் ஸ்வரேவை அதிர்ச்சித் தோல்வியுறச் செய்தார். 15-ம் நிலை வீரரான ஆந்த்ரே ரூபலேவ்(ரஷ்யா) 2-6, 6-4, 6-3, 4-6, 6-3 என்ற செட் கணக்கில் ஹாங்காங்கின் கோல்மேன் வாங்கை சாய்த்தார்.
மகளிர் பிரிவு: மகளிர் பிரிவு 3-வது சுற்றில் போலந்து வீராங்கனை இகா ஸ்வியாடெக் வெற்றி பெற்று 4-வது சுற்றுக்குத் தகுதி பெற்றார். 2-ம் நிலை வீராங்கனை இகா ஸ்வியாடெக் 7-6 (7/2), 6-4 என்ற செட் கணக்கில் 29-ம் நிலை வீராங்கனையான ரஷ்யாவின் அன்னா காலின்ஸ்கயாவை தோற்கடித்தார்.
8-ம் நிலை வீராங்கனையான அமெரிக்காவின் அமண்டா அனிசிமோவா 6-4, 4-6, 6-2 என்ற செட் கணக்கில் ருமேனியாவின் ஜாக்குலின் கிறிஸ்டியனையும், 18-ம் நிலை வீராங்கனையான பிரேசிலின் பீட்ரிஸ் ஹட்டாட் மையா 6-1, 6-2 என்ற செட் கணக்கில் கிரீஸ் நாட்டின் மரியா சக்காரியையும், 13-ம் நிலை வீராங்கனையான ரஷ்யாவின் இகாட்டெரினா அலெக்சான்ட்ரோவா 6-0, 6-1 என்ற கணக்கில் ஜெர்மனியின் லாரா சீஜ்முண்டையும் வீழ்த்தினர்.
பாம்ப்ரி-வீனஸ் ஜோடி வெற்றி: யுஎஸ் ஓபன் டென்னிஸ் போட்டியின் ஆடவர் இரட்டையர் பிரிவில் இந்தியாவின் யூகி பாம்ப்ரி-நியூஸிலாந்தின் மைக்கேல் வீனஸ் ஜோடி வெற்றி பெற்றுள்ளது.
நேற்று முன்தினம் நடைபெற்ற ஆடவர் இரட்டையர் முதல் சுற்றுப் போட்டியில் பாம்ப்ரி-மைக்கேல் ஜோடி 6-0, 6-3 என்ற நேர் செட்களில் மார்க்கோஸ் கிரோன், லேர்னல் டியன் ஜோடியை வீழ்த்தியது.
மற்றொரு ஆட்டத்தில் இந்தியாவின் ரோஹன் போபண்ணா, மொனாக்கோவின் ரொமெய்ன் அர்னீடோ ஜோடி 4-6, 3-6 என்ற செட் கணக்கில் அமெரிக்காவின் ராபர்ட் கேஷ், ஜேம்ஸ் டிராசி ஜோடியிடம் தோல்வி கண்டது. மற்றொரு இரட்டையர் ஆட்டத்தில் இந்தியாவின் அர்ஜுன் கதே, ஈக்வடாரின் டியாகோ ஹிடால்கோ ஜோடி 7-5, 6-7(4), 4-6 என்ற செட் கணக்கில் குரோஷியாவின் மேட் பாவிக், எல் சால்வடாரின் மார்செலோ அரேவலோ ஜோடியிடம் வீழ்ந்தது.
