புதுடெல்லி: ஆசிய கால்பந்து கூட்டமைப்பு சார்பில் மகளிருக்கான ஆசிய கோப்பை கால்பந்து தொடர் வரும் 2026-ம் ஆண்டு மார்ச் 1 முதல் 21-ம் தேதி வரை ஆஸ்திரேலியாவில் நடைபெறுகிறது. 12 அணிகள் கலந்து கொள்ளும் இந்தத் தொடருக்கான ‘டிரா’ நிகழ்வு நேற்று சிட்னியில் நடைபெற்றது. தொடரில் பங்கேற்கும் 12 அணிகளும் 3 பிரிவுகளாக பிரிக்கப்பட்டுள்ளன.
இந்திய மகளிர் அணி ‘சி’ பிரிவில் இடம் பெற்றுள்ளது. இதே பிரிவில் முன்னாள் சாம்பியன்களான ஜப்பான், சீன தைபே மற்றும் வியட்நாம் அணிகளும் இடம் பெற்றுள்ளன. இந்திய அணி தனது முதல் ஆட்டத்தில் மார்ச் 4-ம் தேதி வியட்நாமுடன் மோதுகிறது. இந்த ஆட்டம் பெர்த் மைதானத்தில் நடைபெறுகிறது. தொடர்ந்து 7-ம் தேதி ஜப்பானுடனும், 10-ம் தேதி சீன தைபேவுடனும் மோதுகிறது. இந்த இரு ஆட்டங்களும் சிட்னியில் நடைபெறுகின்றன. ஒவ்வொரு பிரிவிலும் முதல் இரு இடங்களை பிடிக்கும் அணிகளும் 3-வது இடத்தை பிடிக்கும் சிறந்த அணிகளில் இரண்டும் என மொத்தம் 8 அணிகள் கால் இறுதி சுற்றுக்கு முன்னேறும்.
அரை இறுதிக்கு முன்னேறும் 4 அணிகள் 2027-ம் ஆண்டு பிரேசில் நாட்டில் நடைபெற உள்ளஃ பிபா மகளிர் உலகக் கோப்பை கால்பந்து தொடருக்கு தகுதி பெறும். அதேவேளையில் கால் இறுதியில் தோல்வி அடையும் 4 அணிகள் பிளே ஆஃப் சுற்றில் மோதும். இதில் 2 அணிகள் உலகக் கோப்பை தொடருக்கு தேர்வாகும்.
2011-ம் ஆண்டு உலகக் கோப்பை தொடரை வென்ற ஜப்பான் அணி ஆசிய அளவில், ஃபிபா தரவரிசையில் 7-வது இடத்தில் உள்ளது. அந்த அணி ஆசிய கோப்பை கால்பந்து தொடரில் 2014, 2018-ம் ஆண்டு சாம்பி யன் பட்டம் வென்றிருந்தது. வியட்நாம் தரவரிசையில் 37-வது இடத்தில் உள்ளது. அந்த அணி 2022-ம் ஆண்டு ஆசிய கோப்பை தொடரில் கால் இறுதி சுற்றில் தோல்வி அடைந்திருந்தது. எனினும் பிளே ஆஃப் சுற்றில் முதலிடம் பிடித்து 2023-ம் ஆண்டு உலகக் கோப்பை தொடரில் அறிமுக அணியாக நுழைந்திருந்தது.
ஆசிய கால்பந்து தொடரில் 3 முறை சாம்பியன் பட்டம் வென்றுள்ள சீன தைபே அணி ஃபிபா தரவரிசையில் 42-வது இடத்தில் உள்ளது. அந்த அணியும் உலகக் கோப்பை தொடருக்கு தகுதி பெறும் நோக்கில் களமிறங்கக்கூடும். இந்திய அணி தரவரிசையில் 70-வது இடத்தில் உள்ளது. 1980, 1983-ம் ஆண்டுகளில் இறுதிப் போட்டி வரை முன்னேறிய இந்திய அணி இம்முறை மேம்பட்ட செயல் திறனை வெளிப்படுத்துவதில் கவனம் செலுத்தக்கூடும். ‘ஏ’ பிரிவில் ஆஸ்திரேலியா, தென் கொரியா, ஈரான், பிலிப்பைன்ஸ் அணிகளும், ‘பி’ பிரிவில் வட கொரியா, சீனா, வங்கதேசம், உஸ்பெகிஸ்தான் அணிகளும் உள்ளன. நடப்பு சாம்பியனாக உள்ள சீனா 10-வது முறையாக கோப்பை வெல்லும் முனைப்பில் களமிறங்குகிறது.
