சென்னை: குவாண்ட்பாக்ஸ் சென்னை கிராண்ட்மாஸ்டர்ஸ் செஸ் போட்டி சென்னையில் உள்ள நட்சத்திர ஓட்டலில் நடைபெற்று வருகிறது. போட்டியின் 3-வது நாளான நேற்று மாஸ்டர்ஸ் பிரிவு 3-வது சுற்றில் ஜெர்மனியின் வின்சென்ட் கீமர், இந்திய கிராண்ட் மாஸ்டரான கார்த்திக்கேயன் முரளியுடன் மோதினார். இதில் வெள்ளை காய்களுடன் விளையாடிய வின்சென்ட் கீமர் 30-வது நகர்த்தலின் போது வெற்றியை வசப்படுத்தினார். இது அவருக்கு ஹாட்ரிக் வெற்றியாக அமைந்தது.
இந்திய கிராண்ட் மாஸ்டரான வி.பிரணவ், நெதர்லாந்தின் அனிஷ் கிரியுடன் பலப்பரீட்சை நடத்தினார். இந்த ஆட்டம் 71-வது நகர்த்தலின் போது டிராவில் முடிவடைந்தது. மற்றொரு ஆட்டத்தில் இந்திய கிராண்ட் மாஸ்டர்களான விதித் குஜராத்தி, நிஹால் சரின் மோதினார்கள். இதில் வெள்ளை காய்களுடன் விளையாடிய விதித் குஜராத்தி 61-வது நகர்த்தலின் போது வெற்றி பெற்றார்.
உலக தரவரிசையில் 5-வது இடத்தில் உள்ள அர்ஜுன் எரிகைசி, அமெரிக்க கிராண்ட் மாஸ்டரான ரே ராப்சனுடன் மோதினார்.
இதில் அர்ஜுன் எரிகைசி வெள்ளை காய்களுடனும், ரே ராப்சன் கருப்பு காய்களுடனும் விளையாடினார்கள். இந்த ஆட்டத்தில் 46-வது நகர்த்தலின் போது அர்ஜுன் எரிகைசி வெற்றி பெற்றார்.
அமெரிக்காவின் அவாண்டர் லியாங், நெதர்லாந்தின் ஜோர்டன் வான் பாரஸ்டுடன் பலப்பரீட்சை நடத்தினார். இதில் வெள்ளை காய்களுடன் விளையாடிய அவாண்டர் லியாங் 34-வது நகர்த்தலின் போது வெற்றி பெற்றார்.
சேலஞ்சர்ஸ் பிரிவின் 3-வது சுற்றில் இந்திய கிராண்ட் மாஸ்டர்களான அபிமன்யு புராணிக், சர்வதேச மாஸ்டரான ஜி.பி.ஹர்ஷ்வர்தன் மோதினார்கள். இதில் வெள்ளை காய்களுடன் விளையாடிய அபிமன்யு புராணிக் 41-வது நகர்த்தலின் போது வெற்றி கண்டார். அதேவேளையில் ஆர்.வைஷாலி, லியோன் லூக் மென்டோன்காவிடம் தோல்வி அடைந்தார். இந்த ஆட்டத்தில் வெள்ளை காய்களுடன் விளையாடிய வைஷாலி 62-வது நகர்த்தலின் போது தோல்வி அடைந்தார்.
முதல் இரு ஆட்டங்களிலும் தோல்வி அடைந்த ஹரிகா துரோணவல்லி 3-வது சுற்று ஆட்டத்தை டிராவில் முடித்தார். அதிபன் பாஸ்கரனுடன் மோதிய அவர், வெள்ளை காய்களுடன் களமிறங்கினார். இந்த ஆட்டம் 24-வது நகர்த்தலின் போது டிரா ஆனது. மற்றொரு ஆட்டத்தில் எம்.பிரனேஷ், பா.இனியனை எதிர்கொண்டார். இதில் வெள்ளை காய்களுடன் விளையாடிய எம்.பிரனேஷ் 44-வது நகர்த்தலின் போது இனியனை தோற்கடித்தார். திப்தாயன் கோஷ், ஆர்யன் சோப்ரா மோதிய ஆட்டம் 61-வது நகர்த்தலின் போது டிராவில் முடிவடைந்தது.
3 சுற்றுகளின் முடிவில் மாஸ்டர்ஸ் பிரிவில் வின்சென்ட் கீமர் 3 புள்ளிகளுடன் முதலிடத்தில் உள்ளார். அர்ஜுன் எரிகைசி 2.5 புள்ளிகளுடன் 2-வது இடம் வகிக்கிறார். ரே ராப்சன், அனிஷ் கிரி, அவோண்டர் லியாங், விதித் குஜ்ராத்தி ஆகியோர் தலா 1.5 புள்ளிகளுடன் முறையே 3 முதல் 6-வது
இடங்களில் உள்ளனர். ஜோர்டான் வான் பாரஸ்ட், முரளி கார்த்திக்கேயன், வி.பிரணவ் ஆகியோர் தலா ஒரு புள்ளியுடன் 7 முதல் 9-வது இடங்களில் உள்ளனர். நிஹால் சரின் 0.5 புள்ளிகளுடன் கடைசி இடத்தில் உள்ளார்.
