செயின்ட் லூயிஸ்: சின்க்ஃபீல்ட் கோப்பை செஸ் தொடர் அமெரிக்காவின் செயின்ட் லூயிஸ் நகரில் நடைபெற்று வருகிறது.
இதன் முதல் சுற்றில் சகநாட்டைச் சேர்ந்த கிராண்ட் மாஸ்டரான பிரக்ஞானந்தாவிடம் தோல்வி அடைந்த உலக சாம்பியனான இந்தியாவின் டி.குகேஷ் நேற்று 2-வது சுற்றில் உஸ்பெகிஸ்தானின் நோடிர்பெக் அப்துசத்தோரோவை எதிர்த்து விளையாடினார். வெள்ளை காய்களுடன் விளையாடிய குகேஷ் 50-வது நகர்த்தலின் போது வெற்றி பெற்றார்.
பிரக்ஞானந்தா, அமெரிக்காவின் பேபியானோ கருனா மோதிய ஆட்டம் 37-வது நகர்த்தலின் போது டிராவில் முடிவடைந்தது. அமெரிக்காவின் லேவோன் அரோனியன் – பிரேசிலின் சாமுவேல் சேவியன் மோதிய ஆட்டமும், பிரான்ஸின் மாக்சிம் வச்சியர் லாக்ரேவ் – அமெரிக்காவின் வெஸ்லி சோ ஆகியோர் மோதிய ஆட்டமும், போலந்தின் டுடா ஜான் கிரிஸ்டோஃப் – பிரான்ஸின் அலிரேசா ஃபிரோஸ்ஜா ஆகியோர் மோதிய ஆட்டமும் டிராவில் முடிடைவடைந்தது.
2 சுற்றுகளின் முடிவில் லேவோன் அரோனியன், அலிரேசா ஃபிரோஸ்ஜா, பிரக்ஞானந்தா ஆகியோர் தலா 1.5 புள்ளிகளுடன் முதல் 3 இடங்களில் உள்ளனர். பேபியானோ கருனா, வெஸ்லி சோ, மாக்சிம் வச்சியர் லாக்ரேவ், சாமுவேல் சேவியன், குகேஷ் ஆகியோர் தலா ஒரு புள்ளிகளுடன் 4 முதல் 8-வது இடங்களில் உள்ளனர்.
டுடா ஜான் கிரிஸ்டோஃப் 0.5 புள்ளிகளுடன் 9-வது இடத்தில் உள்ளார். நோடிர்பெக் அப்துசத்தோரோவ் இன்னும் புள்ளிகள் கணக்கை தொடங்காமல் கடைசி இடத்தில் உள்ளார்.
