சென்னை: தங்கம் விலை இன்று (அக்.8) இரண்டாவது முறையாக உயர்ந்து புதிய உச்சத்தைத் தொட்டது. அதன்படி, 22 காரட் ஆபரணத் தங்கத்தின் விலை பிற்பகலில் பவுனுக்கு ரூ.680 உயர்ந்து, ஒரு பவுன் ரூ.91,080 க்கு விற்பனையாகிறது. இன்று ஒரே நாளில் மட்டும் ஒரு பவுன் ரூ.1480 விலை உயர்ந்து அதிர்ச்சியைக் கடத்தியுள்ளது.
சர்வதேச பொருளாதார நிலவரத்துக்கு ஏற்ப தங்கம் விலையில் ஏற்றமும் இறக்கமும் இருந்து வருகிறது. இதன் அடிப்படையில், செப்.6-ம் தேதி ரூ.80,040 ஆக இருந்த ஒரு பவுன் ஆபரணத் தங்கம் செப்.23-ம் தேதி ரூ.85,120 ஆக உயர்ந்தது. எச்1பி விசா கட்டணத்தை அமெரிக்க அரசு உயர்த்தியது.
அமெரிக்க டாலருக்கு நிகரான இந்திய ரூபாய் மதிப்பு வீழ்ச்சி ஆகியவை தங்கம் விலை உயர்வுக்கு முக்கியக் காரணமாக அமைந்தது. அமெரிக்கா வட்டி விகிதங்களைக் குறைக்கலாம் என்ற எதிர்பார்ப்பு அதிகரித்துள்ளது. இதனால், தங்கத்தின் மீதான முதலீடு அதிகரித்துள்ளது. இதுவும் தங்கம் விலை உயர ஒரு காரணம்
இதன்பிறகு, ஓரிரு நாட்கள் இறக்கமாகவும், பெரும்பாலான நாட்கள் ஏற்றமாகவும் இருந்து வந்த நிலையில், நேற்று முன்தினம் (அக்.6) பவுன் தங்கம் ரூ.89 ஆயிரத்தை தொட்டது. இதன் தொடர்ச்சியாக, ஆபரணத் தங்கத்தின் விலை நேற்றும் (அக்.7) பவுனுக்கு ரூ.600 உயர்ந்து, ரூ.89,600-க்கு விற்பனை செய்யப்பட்டது.
இந்நிலையில் இன்று காலையில் (அக்.8) 22 காரட் ஆபரணத் தங்கத்தின் விலை கிராமுக்கு ரூ.100 உயர்ந்து, ஒரு கிராம் ரூ.11,300-க்கு விற்பனையானது. அதேபோல் பவுனுக்கு ரூ.800 உயர்ந்து, ஒரு பவுன் ரூ.90,400-க்கு விற்பனையானது. காலையில் வெள்ளியின் விலையில் மாற்றமின்றி ஒரு கிராம் ரூ.167-க்கும், கட்டி வெள்ளி ஒரு கிலோ ரூ.1,67,000-க்கும் விற்பனை செய்யப்பட்டது.
ரூ.91,000-ஐ கடந்தது… இந்த சூழலில், தங்கத்தின் விலை இன்று இரண்டாது முறையாக உயர்ந்துள்ளது. அதன்படி பிற்பகலில் 22 காரட் ஆபரணத் தங்கம் கிராமுக்கு ரூ.85 உயர்ந்து, ஒரு கிராம் ரூ.11,385 ஆக உயர்ந்துள்ளது. அதேபோல பவுனுக்கு ரூ.680 உயர்ந்து, ஒரு பவுன் ரூ.91,080 ஆக அதிகரித்துள்ளது. இதன்படி இன்று ஒரு நாளில் மட்டும் ஒரு பவுன் தங்கத்தின் விலை 1,480 ரூபாய் அதிகரித்துள்ளது. மேலும், வெள்ளியின் விலையும் ரூ.3 உயர்ந்து ஒரு கிராம் வெள்ளி ரூ.170 ஆக உயர்ந்துள்ளது. ஒரு கிலோ வெள்ளியின் விலை ரூ.1,70,000 ஆக உயர்ந்துள்ளது.
நவராத்திரி தொடங்கி தீபாவளி வரை பண்டிகை காலம் என்பதால் நகை விலை அடிக்கடி புதுப்புது உச்சங்களைத் தொட்டுவரும் சூழலில் அக்.20 தீபாவளியை ஒட்டி தங்கம் விலை எந்த உச்சத்தைத் தொடுமோ என்று நகை வாங்குவோர் மத்தியில் கலக்கம் ஏற்பட்டுள்ளது.
இந்த வாரம் தொடங்கியதிலிருந்து தங்கம் விலை நிலவரம்:
அக்.8 (புதன்) – ஒரு பவுன் ரூ.91,080 (பிற்பகல் நிலவரம்); ரூ.90,400 (காலை நிலவரம்)
அக்.7 (செவ்வாய்) – ஒரு பவுன் ரூ.89,600
அக்.6 (திங்கள்) – ஒரு பவுன் ரூ.89,000
