மதுரை: நீதிபதிகளையும், நீதித்துறையையும் விமர்சித்து சமூக வலைதளங்களில் வீடியோ வெளியிட்ட வழக்கறிஞர் வாஞ்சிநாதன் மீது நீதிமன்ற அவமதிப்பு நடவடிக்கை எடுக்க தலைமை நீதிபதிக்கு உயர் நீதிமன்ற அமர்வு பரிந்துரை செய்துள்ளது.
உயர் நீதிமன்ற மதுரை அமர்வு நீதிபதி ஜி.ஆர்.சுவாமிநாதன். இவர் சாதிரீதியாக நடந்து கொள்வதாக உச்ச நீதிமன்ற தலைமை நீதிபதிக்கு வழக்கறிஞர் எஸ்.வாஞ்சிநாதன் புகார் அனுப்பியிருந்தார். இந்தப் புகார் வழக்கறிஞர்கள் வாட்ஸ்அப் குழுவில் வைரலானது.
இந்நிலையில் தஞ்சை தமிழ் பல்கலைக்கழக பேராசிரியர் நியமனம் தொடர்பான மேல்முறையீடு மனு, உயர் நீதிமன்ற மதுரை அமர்வில் நீதிபதிகள் ஜி.ஆர்.சுவாமிநாதன், கே.ராஜசேகர் அமர்வில் ஜூலை 25-ல் விசாரணைக்கு வந்தது. அப்போது மேல்முறையீட்டு வழக்கில் 3-வது எதிர்மனுதாரரின் வழக்கறிஞரான வாஞ்சிநாதனை, நீதிமன்றத்தில் ஆஜராக நீதிபதிகள் உத்தரவிட்டனர்.
அதன்படி வாஞ்சிநாதன் உயர் நீதிமன்றத்தில் ஆஜரானார். அவரிடம் எங்கள் இரு நீதிபதிகளில் ஒருவர் (ஜி.ஆர்.சுவாமிநாதன்) சாதி பாகுபாடுடன் செயல்படுவதாக குற்றம்சாட்டியுள்ளீர்கள். அதே நிலைப்பாட்டில்தான் தற்போதும் உள்ளீர்களா? எனக் கேள்வி எழுப்பினர். அதற்கு, நீதித்துறை மீதான குற்றச்சாட்டு குறித்து எழுத்துப்பூர்வ உத்தரவு பிறப்பித்தால் பதில் அளிப்பதாக வாஞ்சிநாதன் தெரிவித்தார்.
இதையடுத்து நீதிபதி சாதிரீதியாகச் செயல்படுவதாகக் கூறப்பட்ட குற்றச்சாட்டு குறித்து நேரில் ஆஜராகி விளக்கம் அளிக்க உத்தரவிட்டு விசாரணையை ஜூலை 28-க்கு நீதிபதிகள் ஒத்திவைத்தனர். இதற்கிடையே, வழக்கறிஞர் வாஞ்சிநாதன் மீது நீதிமன்ற அவமதிப்பு நடவடிக்கை எடுப்பதைக் கைவிடுமாறு உயர் நீதிமன்ற ஓய்வு பெற்ற நீதிபதிகள் கே.சந்துரு, டி.ஹரிபரந்தாமன், சி.டி.செல்வம், அக்பர்அலி, பி.கலையரசன், எஸ்.விமலா, எஸ்.எஸ்.சுந்தர் ஆகியோர் உயர் நீதிமன்ற அமர்வுக்கு வேண்டுகோள் விடுத்தனர்.
வழக்கறிஞர்கள் சங்கங்களும் நீதிமன்ற அவமதிப்பு நடவடிக்கையைக் கைவிடுமாறு கோரிக்கை வைத்தன. இந்நிலையில், வாஞ்சிநாதன் வழக்கு நீதிபதிகள் ஜி.ஆர்.சுவாமிநாதன், கே.ராஜசேகர் அமர்வில் நேற்று விசாரணைக்கு வந்தது. வாஞ்சிநாதன் ஆஜராகி விளக்க அறிக்கையைத் தாக்கல் செய்தார். அப்போது, தமிழக முதல்வருக்கு பல்கலைக்கழக வேந்தருக்கான அதிகாரம் வழங்கும் சட்டத்துக்கு தடை கோரிய வழக்கில் நீதிபதி ஜி.ஆர்.சுவாமிநாதன் அமர்வு நடத்திய விசாரணையை வாஞ்சிநாதன் விமர்சனம் செய்து பேசிய வீடியோ ஒளிபரப்பப்பட்டது.
‘இந்த வீடியோவில் நீதித்துறையைக் கடுமையாக விமர்சித்து கருத்து தெரிவித்துள்ளீர்கள். அதற்கு என்ன பதில் சொல்கிறீர்கள்?’ என வாஞ்சிநாதனிடம் நீதிபதி ஜி.ஆர்.சுவாமிநாதன் கேட்டார். அதற்கு வாஞ்சிநாதன், ‘வீடியோவில் எப்படி வேண்டுமானாலும் மாற்றம் செய்யலாம், வீடியோவை ஒளிபரப்பி அதற்கு விளக்கம் கேட்பது முறையல்ல. வீடியோ தலைப்புக்கு நான் பொறுப்பல்ல. எழுத்துப் பூர்வமாகக் கேட்டால் பதில் அளிக்கிறேன்.
மேலும் உங்கள் (ஜி.ஆர்.சுவாமிநாதன்) மீது நான் தெரிவித்த புகாரை நீங்களே விசாரிக்க முடியாது’ என்றார். அதற்கு நீதிபதி ஜி.ஆர்.சுவாமிநாதன், ‘நாங்கள் தலைமை நீதிபதிக்கு புகார் அனுப்பியது குறித்து விசாரிக்கவில்லை. நீங்கள் வைத்த குற்றச்சாட்டில் தற்போதும் அதே நிலையில் இருக்கிறீர்களா? என விளக்கம் கேட்கத்தான் அழைத்தோம். அதற்குள் நீதிமன்ற அவமதிப்பு நடவடிக்கை எடுத்ததாக நீங்களும், உங்கள் பின்னால் இருப்பவர்களும் பேசி வருகிறார்கள்.
நீங்கள் என்னுடைய தீர்ப்பை விமர்சிப்பதற்கு நூறு சதவீதம் உரிமை உள்ளது. அதற்கு நானே ஆதரவு தெரிவிக்கிறேன். ஆனால், சாதி பாகுபாட்டுடன் தீர்ப்பளிப்பதாகக் குற்றம்சாட்டுவது என்பது வித்தியாசமானது. அதை ஏற்றுக்கொள்ள முடியாது. நாங்கள் ஒன்றும் முட்டாள்கள் அல்ல. இதை உங்களுடன் இருக்கும் வழக்கறிஞர்களிடமும், ஓய்வுபெற்ற நீதிபதிகளிடமும் கூறுங்கள். எனது நீதித்துறை செயல்பாட்டில் யாரும் தலையிட முடியாது.
தொடர்ந்து 4 ஆண்டுகளாக நீதித்துறையை, நீதிபதிகளை விமர்சனம் செய்து வருகிறீர்கள்? சமூக வலைதளங்களில் நீதிபதி ஜி.ஆர்.சுவாமிநாதன் சாதிரீதியாக நடந்து கொள்கிறார் எனக் கூறியுள்ளீர்கள். அது உண்மை என்றால் நீதிமன்ற அவமதிப்புதான். என்ன பதில்சொல்லப் போகிறீர்கள்?’ எனக் கேட்டனர்.அதற்கு வாஞ்சிநாதன், ‘எழுத்துப்பூர்வமாக உத்தரவிட்டால், பதிலளிக்கத்தயார்’ என்றார். பின்னர் நீதிபதி ஜி.ஆர்.சுவாமிநாதன், ‘வாய்மொழியாகப் பதில் அளித்தால்போதும். பதிலளிக்கத் தயங்குவது ஏன்?’ என்றார்.
இதையடுத்து நீதிபதிகள் பிறப்பித்த உத்தரவு வருமாறு:வழக்கறிஞர் வாஞ்சிநாதன், தமிழக பல்கலைக்கழக வேந்தர் அதிகாரத்தை முதல்வருக்கு மாற்றி பிறப்பித்த சட்டத்தை எதிர்த்து தொடரப்பட்ட வழக்கில் நீதிமன்றம் பிறப்பித்த உத்தரவை விமர்சித்தும், பொது ஊடகங்களில் நீதித்துறையை விமர்சித்தும் பேசியுள்ளார். முந்தைய விசாரணையின்போது இதுகுறித்து விளக்கமளிக்க வாஞ்சிநாதன் ஆஜராக உத்தரவிடப்பட்டது. அதன்படி அவர் ஆஜரானார்.
அப்போது அவர் மீது நீதிமன்ற அவமதிப்பு நடவடிக்கை எடுக்கப்படும் என மிரட்டப்படவில்லை. அவர் மீது நீதிமன்ற அவமதிப்பு எடுக்கப்படாத நிலையில், இதில் தலைமை நீதிபதி தலையிட வேண்டும் என ஓய்வுபெற்ற நீதிபதிகள் கோரியது துரதிருஷ்டவசமானது. இன்றும் வாஞ்சிநாதன் உரிய பதில் அளிக்கவில்லை. அவரின் செயல்பாடு நீதிமன்ற அவமதிப்பு என கருதுகிறோம். எனவே, அவர் மீது நடவடிக்கை எடுக்க உயர் நீதிமன்ற தலைமை நீதிபதிக்குப் பரிந்துரைக்கிறோம். இவ்வாறு உத்தரவில் கூறப்பட்டுள்ளது.
