தமிழகத்தில் சென்னை, மதுரை, திருச்சி உட்பட 12 இடங்களில் நேற்று வெப்பநிலை 100 டிகிரியை தாண்டியது. ஒருசில மாவட்டங்களில் இன்றும், நாளையும் கனமழை பெய்ய வாய்ப்பு உள்ளதாக வானிலை ஆய்வு மையம் தெரிவித்துள்ளது. இதுதொடர்பாக சென்னை வானிலை ஆய்வு மையம் வெளியிட்ட செய்திக்குறிப்பு:
தென்மேற்கு வங்கக்கடல் மற்றும் அதை ஒட்டிய தமிழக கடலோர பகுதிகள் மீதும், அந்தமான் கடல் பகுதிகளிலும் வளிமண்டல கீழடுக்கு சுழற்சிகள் நிலவுகின்றன. இதன் காரணமாக தமிழகத்தில் ஒருசில இடங்களில் இன்று (மே 15) முதல் 20-ம் தேதி வரை இடி, மின்னல் மற்றும் பலத்த காற்றுடன் லேசானது முதல் மிதமான மழை பெய்யக்கூடும். இன்று (மே 15) கிருஷ்ணகிரி, தருமபுரி, திருப்பத்தூர், வேலூர் மாவட்டங்களிலும், நாளை (மே 16) தஞ்சாவூர், திருவாரூர், நாகப்பட்டினம், மயிலாடுதுறை, புதுக்கோட்டை, கடலூர், அரியலூர், பெரம்பலூர், திருச்சி மாவட்டங்களிலும் ஓரிரு இடங்களில் கனமழை பெய்ய வாய்ப்பு உள்ளது.
சென்னை மற்றும் புறநகர் பகுதிகளில் இன்று வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்யக்கூடும். வெப்பநிலை 84 டிகிரி முதல் 99 டிகிரி ஃபாரன்ஹீட் வரை இருக்கக்கூடும். தமிழகத்தில் 16 முதல் 18-ம் தேதி வரை அதிகபட்ச வெப்பநிலை வழக்கத்தைவிட 5 டிகிரி ஃபாரன்ஹீட் வரை உயரக்கூடும்.
18-ம் தேதி வரை தென் தமிழக கடலோர பகுதிகள், மன்னார் வளைகுடா, அதை ஒட்டிய குமரிக்கடல் பகுதிகளில் மணிக்கு 45-50 கி.மீ. வேகத்திலும், இடையிடையே 55 கி.மீ. வேகத்திலும் சூறாவளி காற்று வீசக்கூடும். எனவே, இப்பகுதிகளுக்கு மீனவர்கள் செல்ல வேண்டாம்.
நேற்று காலை 8.30 மணி வரையிலான 24 மணி நேரத்தில் அதிகபட்சமாக திருச்சி மாவட்டம் மருங்காபுரி, நீலகிரி மாவட்டம் கோத்தகிரி, கேத்தி, தூத்துக்குடி மாவட்டம் சாத்தான்குளம், ஈரோடு மாவட்டம் நம்பியூரில் 3 செ.மீ., கிருஷ்ணகிரி, திருப்பத்தூர், நீலகிரி மாவட்டம் பில்லிமலை எஸ்டேட், நடுவட்டம், தருமபுரி மாவட்டம் பாப்பிரெட்டிப்பட்டி, அரூர், திருச்சி மாவட்டம் சிறுகுடி, கோவை மாவட்டம் சின்னக்கல்லார், திண்டுக்கல் மாவட்டம் ஒட்டன்சத்திரம், ஈரோடு மாவட்டம் கொடிவேரியில் 2 செ.மீ. மழை பதிவாகியுள்ளது.
இவ்வாறு அதில் கூறப்பட்டுள்ளது.
இதற்கிடையே, தமிழகத்தில் நேற்று அதிகபட்சமாக ஈரோட்டில் 106 டிகிரி, கரூர் பரமத்தி, திருச்சியில் 105 டிகிரி, வேலூர், திருத்தணி, பரங்கிப்பேட்டை, பாளையங்கோட்டை, மதுரை விமான நிலையத்தில் 104 டிகிரி, மதுரை மாநகரில் 103 டிகிரி, தஞ்சாவூரில் 102 டிகிரி, சேலத்தில் 101 டிகிரி, சென்னை மீனம்பாக்கத்தில் 100 டிகிரி ஃபாரன்ஹீட் வெப்பம் பதிவானது.
