புதுடெல்லி: தமிழ் உட்பட 21 மொழிகளில் பிரதமர் மோடிக்கு பிறந்த நாள் வாழ்த்து கூறும் வீடியோவை டெல்லி முதல்வர் ரேகா குப்தா நேற்று வெளியிட்டார். பிரதமர் நரேந்திர மோடி இன்று தனது 75-வது பிறந்த நாளை கொண்டாடுகிறார்.
இதையொட்டி டெல்லி பள்ளி மாணவ, மாணவியர் தமிழ் உட்பட 21 மொழிகளில் பிரதமர் மோடிக்கு பிறந்த நாள் வாழ்த்துகளை கூறும் ஆடல், பாடல் வீடியோவை டெல்லி முதல்வர் ரேகா குப்தா நேற்று வெளியிட்டார். அந்த வீடியோவில் டெல்லி தமிழ் கல்வி கழக பள்ளியின் மாணவியர் உட்பட பல்வேறு மொழி, கலாச்சார பின்னணி கொண்ட மாணவ, மாணவியர் ஆடி, பாடி பிரதமருக்கு பிறந்த நாள் வாழ்த்துகளை கூறியுள்ளனர்.
இதுகுறித்து முதல்வர் ரேகா குப்தா கூறியதாவது: டெல்லியின் வளர்ச்சிக்காக பிரதமர் நரேந்திர மோடி அயராது பாடுபட்டு வருகிறார். அவருக்கு நன்றி செலுத்தும் வகையில் 21 மொழிகளில் டெல்லி மாணவ, மாணவியர் வாழ்த்துப் பாடலை பாடி உள்ளனர். இந்த வாழ்த்து வீடியோவை டெல்லி கல்வித் துறை தயார் செய்தது. பாடல் வாயிலாக பிரதமருக்கு வாழ்த்து கூறிய அனைத்து மாணவ, மாணவியரையும் பாராட்டுகிறேன். இவ்வாறு முதல்வர் ரேகா குப்தா தெரிவித்தார்.
