சுதா கொங்கரா இயக்கத்தில் சிவகார்த்திகேயன் ஹீரோவாக நடிக்கும் படம், ‘பராசக்தி’. இது அவருடைய 25-வது படம். இதில் வில்லனாக ரவி மோகன் நடிக்கிறார். ஸ்ரீலீலா, அதர்வா, ராணா முக்கிய கதாபாத்திரங்களில் நடிக்கின்றனர்.
டான் பிக்சர்ஸ் தயாரிக்கும் இந்தப் படத்துக்கு ஜி.வி.பிரகாஷ் குமார் இசை அமைக்கிறார். ரவி கே.சந்திரன் ஒளிப்பதிவு செய்கிறார். 1960-களில் நடக்கும் படமான இது, கல்லூரி பின்னணியில் நடக்கும் இந்தி எதிர்ப்பு கதையைக் கொண்டது. இந்நிலையில் இந்தப் படத்தின் ரிலீஸ் தேதியை, டான் பிக்சர்ஸ் வெளியிட்டுள்ளது.
அதன்படி பொங்கல் பண்டிகையை ஒட்டி, 2026 ஜன.14-ம் தேதி இந்தப் படம் வெளியாகிறது. ஜன.9-ம் தேதி விஜய்யின் ஜனநாயகன் வெளியாகும் என்று அறிவிக்கப்பட்டுள்ள நிலையில் இந்தப் படமும் பொங்கலுக்கு வெளியாக இருக்கிறது.
