கவின் நடித்துள்ள ‘கிஸ்’ படத்தின் வெளியீட்டு தேதி அறிவிக்கப்பட்டுள்ளது.
கவின் நாயகனாக நடித்துள்ள படம் ‘கிஸ்’. இதன் இறுதிகட்டப் பணிகள் மும்முரமாக நடைபெற்று வருகின்றன. தற்போது இப்படம் செப்டம்பர் 19-ம் தேதி வெளியாகும் என அறிவிக்கப்பட்டுள்ளது. விரைவில் விளம்பரப்படுத்தும் பணிகளைத் தொடங்க படக்குழு ஆயத்தமாகி வருகிறது.
நடன இயக்குநர் சதீஷ் இயக்குநராக அறிமுகமாகும் படம் ‘கிஸ்’. இதில் கவின், ப்ரீத்தி அஸ்ரானி, மிஷ்கின் உள்ளிட்ட பலர் முக்கிய கதாபாத்திரத்தில் நடித்துள்ளனர். இதன் படப்பிடிப்பு முழுமையாக சென்னையைச் சுற்றியே நடத்தியுள்ளது படக்குழு. ரோமியோ பிக்சர்ஸ் நிறுவனம் தயாரித்துள்ளது.
’கிஸ்’ படத்தின் ஒளிப்பதிவளராக ஹரீஷ் கண்ணன், இசையமைப்பாளராக ஜென் மார்ட்டின், எடிட்டராக ஆர்.சி.பிரனவ் பணியாற்றி வருகிறார்கள். இப்படத்தின் பணிகள் முடிந்துவிட்டதால், அடுத்ததாக வெற்றிமாறன் தயாரித்துவரும் ‘மாஸ்க்’ படத்தில் கவனம் செலுத்தி வருகிறார் கவின்.
