மும்பையை சேர்ந்த பாயல் கபாடியா இயக்கிய படம், ‘ஆல் வி இமேஜின் அஸ் லைட்’. இதில், கனி குஸ்ருதி, திவ்யா பிரபா, சாயா கதம், ஹிருது ஹாரூண் உள்ளிட்டோர் நடித்துள்ளனர்.
கேரளாவைச் சேர்ந்த 2 செவிலியர்களின் மும்பை வாழ்க்கையைச் சொல்லும் கதையை கொண்ட படமான இது, 77-வது கேன்ஸ் திரைப்பட விழாவில் கிராண்ட் பிரி விருதைப் பெற்று சாதனைப் படைத்தது. இதைத் தொடர்ந்து கோல்டன் குளோப் விருதுக்கு, சிறந்த இயக்குநர், சிறந்த வெளிநாட்டுத் திரைப்படம் ஆகிய பிரிவுகளில் பரிந்துரைக்கப்பட்டது. ஆனால், விருது கிடைக்கவில்லை.
இந்நிலையில், இந்தப் படம் இப்போது அர்ஜென்டினாவில் வெளியாகி உள்ளது. இதை அங்கு வெளியிடும் லக்ஸ்பாக்ஸ் பிலிம்ஸ் என்ற நிறுவனம், அர்ஜென்டினா போஸ்டருடன் அறிவித்துள்ளது. அந்நாட்டின் பல்வேறு பகுதிகளில் அம்மொழியில் டப் செய்யப்பட்டு வெளியாகி இருக்கிறது.
