சென்னை: அரசு கல்வியியல் கல்லூரிகளில் பிஎட் படிப்பில் சேருவதற்கு ஆன்லைனில் விண்ணப்பிப்பதற்கானகடைசி நாள் இன்றுடன் முடிவடைகிறது.
நடப்பு கல்வி ஆண்டில் (2025-26) அரசு கல்வியியல் கல்லூரிகள் மற்றும் அரசு உதவி பெறும் கல்லூரிகளில் (அரசு ஒதுக்கீட்டு இடங்கள்) பிஎட் படிப்பில் சேருவதற்கான ஆன்லைன் விண்ணப்ப பதிவு கடந்த ஜூன் 20-ம் தேதி தொடங்கியது. தமிழ், ஆங்கிலம், கணிதம், வேதியியல், தாவரவியல், விலங்கியல்,வரலாறு உள்ளிட்ட பல்வேறு பாடங்களில் இளங்கலை மற்றும் முதுகலை பட்டம் பெற்றவர்கள் விண்ணப்பித்து வருகின்றனர்.
18-ம் தேதி தரவரிசை பட்டியல்: கல்லூரி கல்வி இயக்ககம் ஏற்கெனவே அறிவித்துள்ளபடி, பிஎட் படிப்புக்கு ஆன்லைனில் விண்ணப்பிப்பதற்கான கடைசி நாள் இன்று (9-ம் தேதி) ஆகும். இதைத் தொடர்ந்து, மாணவர்களின் விண்ணப்பங்கள் பரிசீலிக்கப்பட்டு, தகுதியான மாணவர்களின் தரவரிசை பட்டியல் வரும் 18-ம் தேதி வெளியிடப்படும்.
அதன் பிறகு, பிடித்தமான கல்லூரியை தேர்வு செய்வதற்கான கலந்தாய்வு வரும் 21 முதல் 25-ம் தேதி வரை நடைபெறும். கல்லூரி ஒதுக்கீட்டு ஆணை வரும் 28-ம் தேதி வழங்கப்படும். ஒதுக்கீட்டு ஆணை பெற்ற மாணவர்கள் சம்பந்தப்பட்ட கல்வியியல் கல்லூரியில் ஜூலை 31 முதல் ஆக. 4-ம் தேதிக்குள் சேர வேண்டும். முதலாமாண்டு மாணவர்களுக்கான வகுப்புகள் ஆக. 6-ம் தேதி தொடங்கும் என அறிவிக்கப்பட்டுள்ளது.
